Өчигдөр "Мишээл экспо" төвд Цагаан сарын баяр дөхөж байгаатай холбогдуулан “Монголд үйлдвэрлэв-Цагаан сар” үзэсгэлэн худалдаа нээгдсэн. Тэгвэл энэ үзэсгэлэн өнөөдөр "Аса" циркэд мөн нээгдэж байна.

   Монголчууд цагаан сарын баярыг утгаад бүгд Эрээн хотын худалдааны төв рүү хошуурдаг. Тэндээс хүнд хэрэг болохооргүй хужаа бараа оруулж ирдэгийг зогсоож их мөнгөний урсгалыг дотоодынхоо үйлдвэрлэгчдэд чиглүүлэх зорилгоор уг үзэсгэлэнг энэ жил долоо дахь удаагаа зохион байгуулж байна.
  Энэ удаагийн үзэсгэлэн худалдаанд хямд үнэтэй, бэлгэнд өгөхөд тохиромжтой бараа бүтээгдэхүүн үйлдвэрлэдэг албан байгууллага, хувь хүмүүсийг түлхүү оролцуулахаар болжээ. Харин лангууны түрээсийн үнийг Засгийн газраас дээрх үзэсгэлэн болох байгууллагуудтай тохиролцон 15-20 хувиар бууруулж, бууруулсан төлбөрийн 50 хувийг Засгийн газар төлөхөөр зохицуулалт хийх гэнэ. “Монголд үйлдвэрлэв-Цагаан сар” үзэсгэлэн өмнө нь тав хоногийн хугацаанд болдог байсан бол энэ удаад 14-21 хоногийн хугацаатай явуулахаар төлөвлөжээ.

  Хүнсний бүтээгдэхүүн үйлдвэрлэгчид “Аса” циркэд ирэх сарын 10 хүртэл, бусад чиглэлийн үйлдвэрлэл эрхлэгчид “Мишээл экспо” төвд энэ сарын 17-31 хүртэл, “IT world” төвд ирэх сарын 10-ны өдрийг хүртэл үйлдвэрлэсэн бараа бүтээгдэхүүнээ хэрэглэгчдэд дэлгэн үзүүлэх юм.