Өнөөдөр 11 цагаас Монгол бөхийн өргөөнд бидний хүсэн хүлээсэн 2025 оны Бүх цэргийн баяр наадам эхлэх гэж байна. Уг наадамд түрүү бөхийн тааварт яригдаж байгаа болон таавар эвдэх магадлалтай хүчтэнүүдийг онцолж байна. 

Цэргийн заан Ө.Батсуурь

1996 оны зургадугаар сарын 26-нд төрсөн тэрбээр яах аргагүй Цэргийн заан цолондоо ахадсан хүчтэн. "Бөхбилэгт" дэвжээ, ЗХ-013 анги, Очирням ХХК, Хүннү Шоес ХХК, Херо Холдинг ХХК-ийн нэр дээрээс барилдаж байна. Аралтай заан шилдэг Сумын заануудын нэг байж байгаад 2022 оны Бүх цэргийн баяр наадмаар одоогийн Улсмын заан М.Лхагвагэрэлд унаж Цэргийн заан болжээ. Жил бүрийн наадмаар бөхөд хайртай ард түмэн түүнийг цолоо ахиулаасай хэмээн хүсдэгтэй хэн ч маргахгүй. Тэр бол хүмүүсийн хамгийн их тааварлаж, итгэл хүлээлгэж байгаа бөх мөн. 

Аймгийн начин, жүдогийн ОУХМ Б.Гончигсүрэн

1999 онд төрсөн идэр залуухан начин маань их спортод +100 кг руу жин өгссөн. Магадгүй энэ нь түүний Үндэсний бөхөд шулуудсаны илрэл биз. Тэрбээр залуу бөх байхдаа Сумын заануудын барилдаанд гурван удаа түрүүлж, 2023 оны Говьсүмбэр аймгийн баяр наадамд тав давж Аймгийн начин цолыг хүртсэн. Тэр цагаас хойш өхийн өргөөнд аймаг, цэргийн цолтны барилдаанд хоёр ч удаа тасархай түрүүлээд байгаа билээ. 

Аймгийн заан С.Доржпалам 

2000 оныхны төлөөлөл тэрбээр 1000 сумын зааны манлай бөх гэдгээрээ анх олонд танигдаж байв. Түүний барилдааны ур чадвар ахисаар байгаа ч он гарсаар бараг л барилдаагүй. Энэ нь түүний бэртэлтэй холбоотой гэх цуу гарсан. Бөхийн холбооноос өнөөдрийн наадамд барилдах бөхчүүдийг зарлахад тэр байсангүй. Зарын дор "бэртэлтэй байсан бөхчүүдийг нягталж үзээд нэмж зарлана" гэжээ. Магадгүй тэр өнөөдөр барилдах ч юм билүү. Хэн мэдлээ. 

Аймгийн заан Б.Баянсүх

1999 онынхны төлөөлөл хүч, бяраараа хэнийг ч илүүрхээд байдаг залуу заан мөн л бэртэлтэй байгаа. Тэрбээр өнгөрсөн жилийн цэргийн наадмын түрүү бөхөөр яригдаж байсан Цэргийн заан Ө.Батсуурийг гурвын давааны тунаан дээр дуусгасан билээ. Өнөөдөр тэр барилдвал гарцаагүй дээгүүр үзнэ. Магад Ө.Батсуурьтай дахин тунах биз. 

Таван хурц

Өнөөдөр цол горилж ирсэн бөхчүүдийн урмыг хугалж мэдэх Аймгийн хурц арслангууд хэд хэд бий. Тухайлбал, Н.Өсөхбаяр, Д.Алтанцоож, Н.Амгаланбаатар, О.Наранбаатар, Э.Мөнхбаатар нарын улсын цолонд тулцан бөхчүүдийг нэрлэж болно. Өнөө жилийн баяр наадмаар энэ тавыг Монголын бөхөд хайртай ард түмэн улсын цолны босго алхаасай гэж харж байгаа. Өнөөдөр тэд олон ч аавын хүүг ганзага хоосон бууцаана. Тэдгээрээс гадна Аймгийн арслан М.Баасанжав, П.Хүрэлбаатар, Ц.Төмөрцоож, Е.Көптилек, Аймгийн заан Б.Бат-Эрдэнэ, Э.Түмэндэмбэрэл, Т.Батсүрэн, Х.Чойжилсүрэн, С.Ган-Эрдэнэ, Аймгийн начин Б.Бат-Эрдэнэ, Б.Сундуйжав, Сумын заан А.Амархүү, Д.Төгс-Эрдэнэ, Б.Цагаанбанди нарын шилдгүүд өнөөдөр таавар эвдэж мэднэ. 

Л.Баяр