Аливаад "дөр"-тэй хүн гэж байдаг шиг аливаад "дур"-тай хүн гэж бий. Тэр дураараа хөтлүүлж юм, юмны захад хүрдэг нь ч бас байх л юм.

Том тойргийн сонгуульд өрсөлдөх гэж оролдоод мандатаа авч чадаагүй хүн нутгаа санахыг "ИТХ" гэдэг бололтой. 

Тэдний нэг нь Лүндэгийн Наранбаатар гэгч. Өөрийгөө "тэмцэл дунд амьдарсан" гэж хэлэх дуртай. Амьдралынхаа ихэнх жилүүдэд тэмцсэн гэж байгаа. Нээрээ л намаа сольж, баруунаас зүүн рүү алхаж байгаа юм шиг л АН-аас МАН руу зүтгэн орсныг тэмцэл гэж харж болох тал бий ч юм шиг. 

Тэртээ 2015 онд тэр үеийн УИХ-ын дарга З.Энхболд руу оймсоо тайлан шидэж 20 мянган төгрөгөөр торгуулан "алдар" хүртсэн Л.Наранбаатар МАН-даа бүсчилсэн тойрогт "гологдчихсон" гэхэд хилсдэх үү. Парламент мөрөөдөлтэй, УИХ-ын сонгуульд нэр дэвшээд өвдөг шороодсон намтартай тэрбээр нутгаа санасан адуу шиг л гүйж яваа сурагтай. Ямар нэгэн юмны "гишүүн" болж байж л сая нэг санаа нь амрах бололтой шүү. Одоо Дархан-Уул аймаг, Шарын гол сумын 21 дүгээр тойргийн нөхөн сонгуульд аймгийн ИТХ-д МАН-аас өрсөлдөхөөр сурталчилгаагаа эхэлчихсэн явна. 

Тэр оймсоо тайлсны хүчинд хожсон зүйлтэй ч гэгддэг байна. Хөтөлийн цемент шохой үйлвэрийн захирал хүртэл байж үзлээ л шүү дээ.  Тухайн үедээ л Дархан-Уул аймгийн АН-ыг шинэчлэх хөдөлгөөнийг байгуулан тэмцэж байсан боловч сүүлдээ сүүлээ хавчаад зугтсан гэдэг. Үнэндээ түүний амьдрал тэмцэл биш, тооцооллоор л дүүрэн байсан юм биш үү. Амьдралынхаа ихэнх он жилийг тооцоолж өнгөрүүлсэн юм биш үү.

Ер үзэл баримтлал нь хувирамхай, улс төрийн чиг шугамгүй бол, хамгийн гол нь шарваач бол сайхан хослол өмсөж, тод зангиа зүүж, зөөлөн сандалд тухалж, түрийвчээрээ даллаа гээд түмний итгэлийг хүлээж чадахгүй л дээ. 

Үнэндээ Л.Наранбаатарт "Сэлэнгэ Бодонс" багт NBA-ийн 4 удаагийн супер стар, бүх оддын тоглогч, олимпийн аварга Демаркус Казинс гэх тоглогчийг авч ирж, гэрээ үзэглэснээс өөр тэмцэл алга. Энэ нь ч зүгээр нэг сагсан бөмбөгийн төлөөх хоёргүй сэтгэлийн "юм" байгаагүй л болов уу. Энэ хугацаагаа тооцоолсон л байх. 

М.Гал