Монголын багш нарын 47 дахь өдрийг угтсан арга хэмжээ хэдийнэ эхэлжээ. Багш нарын баярыг  угтсан арга хэмжээний хүрээнд  ахмад болон залуу багш нарын уулзалтыг Нийслэлийн Боловсролын газар, Боловсролын ахмад удирдах ажилтны холбоо хамтран зохион байгуулсан юм. Уулзалт халуун дулаан болж, ахмад багш нар залуу багш нартаа ажлын туршлагаасаа хуваалцан зөвлөгөө өгсөн юм.  Ахмад багш нар хүний сэтгэхүй асар хурдацтай хөгжиж, боловсролын түвшин ахиж байгаа ч гэсэн хамгийн гол нь сурагчдаа сайн хүн болгох шүү гэдгийг залуучууддаа захиж байв. Уулзалт, ярилцлага “Хүүхэд нэг бүрийг хөгжүүлэх арга зүй” сэдвийн дор өрнөлөө. Монгол улсын гавьяат багш Баяртогтох алдаагүй зөв бичихэд баг ямар ур чадвар эзэмшсэн байх хэрэгтэй вэ гэдгийг заасан бол гавьяат багш Хишигсүрэн монгол хэл, уран зохиолын хичээлээр хүүхдийн сэтгэхүйг хэрхэн хөгжүүлэхийг залуу багш нарт сургалаа. Ахмад багш нар залуустаа хүүхдийг хэрхэн сургаж хүмүүжүүлэхийг заахаас гадна,үзүүлэн таниулах материал яаж бэлддэг талаараа, сургууль цэцэрлэгийн орчинг цэцэрлэгжүүлдэг аргаа ч хэлж өгсөн юм. Түүнчлэн, юм бүхэн суурьтай байдаг. Суурь хэр бат бөх байхаас аливаа зүйлийн чанар танигддаг. Хүн төрөлхтөний мэдлэгийн суурийг харин цэцэрлэг сургуулийн багш нар тавьдаг. Тийм ч учраас бид бүхэн маш том хариуцлагатан шүү гэдгийг ахмад багш нар онцлон захиж байлаа.  Уулзалтын дараа  ахмад багш нарын туршлагыг судлан сургуульдаа ажиллуулахыг  зарим залуу багш нар хүсэж байсан юм гэж Нийслэлийн Боловсролын газраас мэдээллээ.