МАН-ын УИХ-дахь бүлгийн гишүүд өнөөдөр сэтгүүлчдэд цаг үеийн сэдвээр мэдээлэл өглөө. МАН-ын бүлгээс Төрийн албаны тухай хуульд өөрчлөлт оруулах хуулийн төсөл санаачилсан байна. Энэ төслийг УИХ-ын гишүүн Су.Батболд Д.Лүндээжанцан нар байнгын хороонд өргөн барихаар болжээ. Энэ төслийн гол зарчим нь төрийн албаны томилгоог улс төрийн намаас ангид байлгахад чиглэсэн аж. Мөн Төрийн албаны зөвлөл томилгоог хийхдээ жилд хоёр удаа гэх мэтээр төвлөрүүлэн хийдгийг болиулах санал гаргажээ. ТАЗ-ийн хяналтын чиг үүргээ яамны төрийн нарийн бичгийн даргад шилжүүлэх бөгөөд харин төрийн нарийн бичгийн дарга нарыг өөрийн дураар томилгоо хийж байгаа эсэхийг ТАЗ хянах юм. УИХ-ын гишүүн Су.Батболд "Төрийн албыг төвлөрүүлж томилгоо хийж байна гэж шүүмжилдэг байсан. Үүнийг засаж, эрхийг нь шилжүүлэх тухай хуулийн төсөл. Өмнөх Засгийн газрын үед төрийн албан хаагчдыг намын гишүүнчлэл, нөлөөллөс ангид байх заалт оруулсан ч хармсалтай нь амьдрал дээр хэрэгжихгүй байна. Түр орлон гүйцэтгэгч гэдэг бол төрийн нарийн бичгийн дарга өвдсөн, нас барсан тохиололдолд томилогддог. Ингэж хууль зөрчин түр орлон гүйцэтгэгч томилж байгааг таслан зогсоох заалт оруулсан. Мөн цаашдаа Төрийн албан хаагчдын нийгмийн баталгааны тухай хууль гаргаж бүхэлд нь зохицуулах хэрэгтэй байгаа. Салбар бүрт өөр өөр биш, төрийн албан хаагчид бүгд төрөөс жигд халамж авч байх санааг хэлэлцэж байна. Нийтийн алба гэдэг нэр томъёог бид дэмжихгүй байгаа. Үндсэн хуулийн хаана ч ийм нэр томъёо байхгүй. Тиймээс төрийн алба гэсэн нэрээр нь хэрэглэхийг зүйтэй гэж үзэж байна" гэлээ.
    УИХ-ын гишүүн Д.Лүндээжанцан "Монгол улсанд хуулийн хэрэгжилт нь зогссон ганц хууль байгаа нь Төрийн албаных. Шинэчлэлийн Засгийн газар үгүй гэж хэлж байгаа ч өнөөдөр албан тушаалтнууд нь өөрчлөгдөөгүй төрийн алба гэж байхгүй байна. Өнгөрсөн жилүүдэд бид төрийн албыг тогтвортой байлгах гэж хичээсэн ч өнөөдөр эргээд 1990 оны эхэнд очоод байна" гэв.