МАН-аас аж ахуйн нэгж, компаниудыг Цагаан сарын баярын үеэр үнээ нэмж биш хямдруулж баярлахыг уриаллаа. Бусад оронд аливаа баярын үеэр бараа бүтээгдхүүний хямдрал зарладаг бол Монголд эсрэгээрээ үнэ нь огцом өсдөг. Засгийн газраас үнийг тогтвортой байлгахын тулд 720 тэрбум төгрөг зарцуулсан ч үр дүнгээ өгөхгүй байна гэлээ. МАН-ын бүлгийн дэд дарга С.Бямбацогт "Засгийн газраас аж ахуйн нэгжүүддээ дэмжлэг үзүүлж бараа бүтээгдэхүүний үнийг барина гэж 720 тэрбум төгрөг зарцуулсан байгаа. Гэтэл бодит байдал дээр юмны үнэ хямдарсан зүйл үнэхээр алга. Гурилыг 550 төгрөгөөс дээш гаргахгүй гэж 62 тэрбумыг өгсөн "Алтан тариа"-н гурил өнөөдөр 1000 төгрөг болсон. Мөн 87 тэрбумыг улсын төсвөөс махны компаниудад өгсөн. Гэтэл үхрийн мах 8300, хонины мах 7600 төгрөгийн үнэтэй байна. Өрөөр хэлбэл нөөцийн мах гаргаад ч махны үнийг тогтвортой байлгаж чадахгүй байна.  Бизнес эрхэлж байгаа аж ахуйн нэгжүүдийг дэмжээд байгаа ч юмны үнэ өнгөрсөн оныг бодвол нэмэгдсэн байгаа" гэлээ. Тиймээс өчигдөр тус намын Удирдах зөвлөлийн хурлаас бараа, бүтээгдэхүүний үнийг бууруулахад Засгийн газрын авч байгаа арга хэмжээг судалж, үнийг буулгахад шахаж шаардах чиглэл өгчээ. Энэ ажлын хэсгийг УИХ-ын гишүүн Су.Батболд ахлах юм байна. 

Мөн 10 гаруй аймгийн 91 сум өвөлжилт хүндэрсэнтэй холбоотойгоор малчдад сэтгэл санааны болон эд материалын дэмжлэг үзүүлэхийг уриаллаа. УИХ-ын гишүүн Д.Лүндээжанцан "Малчид маань сайн бэлтгэл хийсний дүнд гарз хохирол багатай байна. Гэхдээ зарим газраар малын өвдөг, туурай хөлдөж, халцарч байна. Олон малчин 70-150 км-т отор хийн нүүж байна. Хээлтэй мал 100 гаран км тууврыг дагана гэсэн үг. Ийм хүнд үед Засгийн газар онцгой анхаарах хэрэгтэй байна. Манай намын бүлгээс малаас гадна хүнээ анхаарахыг уриалж байна. Олон хүүхэдтэй эхчүүд, ахмадуудын эрүүл мэндийн байдал хэцүү байгаа. Тиймээс хүн эмнэлгийн машинуудаар яаралтай хангах хэрэгтэй. Ядахдаа өвөлжилт хүнд байгаа малчид руугаа гэрийнхэн, найз нөхөд нь утсаар яриад сэтгэл санаагаар дэмжих хэрэгтэй гэж бодож байна" гэлээ.