Эдийн засгийн болон Байгаль орчин, Хүнс, хөдөө аж ахуйн байнгын хорооны хамтарсан хуралдаан Төрийн ордны “А” танхимд ширүүхэн болж өндөрлөв. Хуралдаанаар “Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол”-ыг батлах тухай” УИХ-ын тогтоолын төслийн хэлэлцэх эсэхийг хэлэлцсэн юм. Хуралдаанаар хотын дарга Э.Бат-Үүл нийслэл хотын дахин төлөвлөлтийн талаар гишүүдэд мэдээлэл өгсөн юм.

Энэ үеэр Ж.Энхбаяр гишүүн хотын даргаас “Э.Бат-Үүл дарга та ардчилсан үзлийг нэлээд ярьдаг хүн. Гэвч сүүлийн зургаан сар иргэддээ зориулсан ямар ажил хийсэн юм бэ. Хийсэн ажил нь гэвэл барилгын салбар сөхөрч байх шиг байна. Иргэд арилжааны банкнаас зээл авлаа гэхэд хүүнд нь нэг сая төгрөг төлж байна. Нэг ёсондоо дундаж иргэн байр авах боломжгүй боллоо. Газар хувьчилна гэх л юм. Бэлчээрийг яаж хувьчлах гээд байгаа юм. Аж ахуй нэгжийн газрыг хувьчилна гээд байна. Гэтэл хотын төвд Бодь, Женко, АПУ-гийн барилга дүүрээд байна. Та хүүхдийн паркыг буцааж өгч чадах юм уу” хэмээн нэлээд ширүүхэн асуултаа тавилаа. Хариуд хотын дарга нэлээд уурсаж, “Ж.Энхбаяр аа, чи залуу хүн байж ямар өрөвдмөөр юм ярьдаг юм бэ. Сайн юмыг ярьж сур. Би чамтай улстөржөөгүй байна. Юу ч мэдэхгүй байж ухаантай царайлаад байх чинь. Муу бацаан минь юмаа мэдчихээд ярь. Битгий худлаа мэдэмхийрээд бай. Иргэдийг тэнэг гэдгээ боль” хэмээсэн юм.