Жилийн өмнө, сонгуулийн шоу ид өрнөж байх үед Зам тээвэр, барилга хот байгуулалтын сайд байсан Х.Баттулгыг хятад, солонгосчуудтай хамтарч нууц гэрээ хийсэн гэж Хууль зүйн сайд байсан Ц.Нямдорж мэдэгдэж байлаа. Тухайн үед ийм гэрээ хийгдээгүй гэж Х.Баттулга хэд дахин нотлон ярьсан ч Ц.Нямдорж өөрийн байр суурин дээрээ бат зогсож байв. Тэр байтугай Х.Баттулга болон АН-ын сайд нарыг Засгийн газраас гарах үеэр Ц.Нямдорж Зам тээвэр, барилга хот байгуулалтын яамны төрийн нарийн бичгийн дарга, газрын дарга нарыг хэвлэлийнхний өмнө бүлтэлзүүлэн Х.Баттулгын нууц гэрээ хийсэн гэдгийг нотлуулахыг оролдож ч байв. Олон нийт сүүлдээ МоАХ-ны даргыг үнэхээр нууц гэрээ хийсэн юм болов уу гэсэн бодол, сэтгэгдэлтэй үлдсэн. Тиймээс Х.Баттулга нууц мууц гэрээ байхгүй гэдгийг шалгуулахаар Хан-Уул дүүргийн шүүхэд хандсан билээ. Анхан шатны шүүх ч тэр, дараагийн шатны шүүх ч тэр Х.Баттулгыг буруугүй гэж үзэн харин Ц.Нямдорж хүн гүтгэсэн хэрэгт унасан. Сонирхолтой нь "Женко" группын захирал, Монголын толгой баячуудын нэг гэсэндээ Х.Баттулга түүнээс мөнгө нэхэлгүй харин зөвхөн уучлалт гуйхыг шаардсан. Гэтэл Ц.Нямдорж гишүүн таг чиг. Шүүхийн шийдвэр гарчихаад байхад таг чиг. Нэгэнт буруугүй нь нотлогдсон юм чинь Х.Баттулга ч заавал уучлалт гуй гэж шахаж шаардаагүй бололтой. Гэтэл М.Энхсайханы өдөөсөн төмөр замын дуулианаар Ц.Нямдорж сайд энэ талаар дахин ам нээж Х.Баттулга хятад, солонгосчуудтай хамтарч гэрээ байгуулсан гэж мэдэгдээд байна. Тэрбээр "Сайншандаас Ухаа худаг хүртэлх зам барих ажлыг Хятадын компанид өгч, Таван толгойд мөн онцгой эрх өгөхөөр гарын үсэг зурсан. Миний 4 жилийн өмнө ярьж байсан зүйлийг М.Энхсайхан ярихаар замаасаа зайлуулах  гэсэн нь энэ" гэх зэргээр жилийн өмнөхөө давтав. Харин түүний энэ "давтан" үйлдэлд Х.Баттулга сайд гомдол гаргасангүй. Жингийн цуваа явж л байдаг гэсэн шиг Ц.Нямдорж гишүүнд үг хаяхгүй байна.     

    Одоо Хан-Уул дүүргийн шүүхийн шийдвэрийг биелүүлэхгүй олон сар болсон, түүгээр барахгүй дахин нууц гэрээ хийсэн гэж хэвлэлийнхэнд мэдэгдсэн Ц.Нямдоржид хариуцлага ирэх үү? гэдэг асуулт үлдэж байна. Гэхдээ энэ бол зөвхөн Х.Баттулга, Ц.Нямдорж хоёрын хоорондын хэрүүл биш. Монголчууд тэр олон гэрээ, санамж бичиг гэсэн хэрүүлийн дунд чухам юу болсныг мэдэж чадсангүй. Гэхдээ шүүхээр нууц гэрээ байгуулаагүй гэдгийг баталсаар байхад Ц.Нямдорж хууль зүйн сайд байсан хүн атлаа яагаад ингэж дахин дахин ярьж явна? Маш олон мэдээллийг дотроо хадгалж явдаг түүнд ингэж "давтан" үйлдэх ямар хэрэг байна вэ? Ядаж байхад Х.Баттулга сайдын нэр мөнгө угаасан хэрэгт шалгагдаж байгаа "Монголиан Эйрлэйнз" компанитай холбогдоод байгаа...