МАХН-ын Ерөнхий нарийн бичгийн дарга Г.Шийлэгдамба өнөөдөр сэтгүүлчдэд мэдээлэл хийлээ. Тэрээр “МАХН-ын дарга Н.Энхбаяр ШШГЕГ-ын харьяа хорих 401 дүгээр ангийн эмнэлэгт байгаа. Гэхдээ эмчилгээ хийлгээгүй бие нь тааруу байгаа. Хэдийгээр хорих ангид эмчлэгдэж байгаа хүнд, онц хүнд гэмт хэрэгтнийг Улсын хоёрдугаар эмнэлэгт шилжүүлэн эмчлэх шийдвэрийг Эрүүл мэндийн сайд Н.Удвал, Хууль зүйн сайд Х.Тэмүүжин нар гаргасан ч прокурорын байгууллага саад болж байна” гэлээ.Шийдвэрийн дагуу ШШГЕГ болон Улсын хоёрдугаар эмнэлгийн хооронд хамтран ажиллах гэрээ дөнгөж эхлэл шатандаа яваа ч шилжүүлэн эмчлүүлэх ялтнуудын нэрс эхнээсээ тодорхой болж, батлагджээ.
Тодруулбал, танхайн хэргээр 3.6 жилийн ял авч хорих 421 дүгээр ангид ял эдэлж буй Б.Болдбаатар артерийн даралт ихэссэн үндэслэлээр, долдугаар сарын 1-ний хэрэгт буруутгагдаж, эрх мэдлээ урвуулан ашиглаж, хэтрүүлсэн, хэрэгжүүлэхгүй байх үндэслэлээр 3.6 жилийн ял авсан Ш.Батсүх чихрийн шижин өвчний улмаас, авлига авсан хэргээр 2.6 жилийн ял сонсож хорих 441 дүгээр ангид ял эдэлж байгаа Говьсүмбэр аймгийн засаг дарга асан Ж.Баянмөнх чихрийн шижин өвчний улмаас, залилангийн хэргээр долоон жилийн ял сонсож хорих 403 дугаар ангид ял эдэлж буй Д.Чинзориг баруун хөл, гар нь саажсаны улмаас, хулгайн хэргээр арван жилийн ял авч, хорих 427 дугаар ангид ял эдэлж байгаа Д.Мэгзэр нурууны хагалгаанд орсон учраас, хүн амины хэргээр 11 жилийн ял авч, одоо хорих 437 дугаар ангид ял эдэлж байгаа Ш.Дашцэрэн тархины цусан хангамж муудсан гэдгээр, хүчингийн гэмт хэрэг үйлдэж 16 жилийн ял сонсон 413 дугаар ангид ял эдэлж байгаа Б.Даваажав артерийн даралт нь гуравдугаар үедээ орсноор гадуур эмчлүүлэх жагсаалтад багтсан байна.
Түүнчлэн уг жагсаалтын төгсгөлд бусдын эд хөрөнгийг завшиж үрэгдүүлсэн хэргээр 2.6 жилийн ял авч хорих 441 дүгээр ангид ял эдэлж буй ялтан Н.Энхбаярын нэр багтсан байна. Харин эдгээрээс эхний ээлжид нурууны хагалгаанд ороод удаагүй байгаа 35 настай Д.Мэгзэр, тархины цусан хангамж багасч хямарсан оноштой 81 настай Ш.Дашцэрэн, хуурай өлсгөлөнгийн дараах бодисын солилцооны хямралын хамж шинжид орсон 54 настай Н.Энхбаярыг эмчлэхээр сонгосон байна.
Б.Чимэг
Сэтгэгдэл (14)