Улсын Дээд шүүхийн хяналтын шатны эрүүгийн хэргийн шүүх хуралдаанаар Г.Бямбаа, Д.Сэнгээрэнцэн, Б.Ариунцэцэг нарт холбогдох эрүүгийн хэргийг ялтны өмгөөлөгчийн гаргасан гомдлыг үндэслэн өнөөдөр хянан хэлэлцлээ.Г.Бямбаа нь хар тамхи, сэтгэцэд нөлөөлөх бодис агуулсан бэлдмэлийг бусдад худалдан борлуулах зорилгоор олж авч, 2012 оны 1 дүгээр сарын 10-наас хойш нэг сарын хугацаанд өөрийн биедээ хадгалсан гэмт хэргийг үйлджээ.
Д.Сэнгээрэнцэн, Б.Ариунцэцэг нар нь худалдан борлуулах зорилгогүйгээр сэтгэцэд нөлөөлөх бодис агуулсан бэлдмэлийг Г.Бямбаагаас авч, хадгалсан гэмт хэргийг үйлдсэн байна.
Нийслэлийн Баянгол дүүргийн шүүх дээрх хэргийг 2012 оны 11 дүгээр сарын 5-ны өдөр анхан шатны журмаар хянан хэлэлцээд Г.Бямбаад Нийслэлийн прокурорын газраас Эрүүгийн хуулийн тусгай ангийн 188 дугаар зүйлд зааснаар яллах дүгнэлт үйлдэж ирүүлсэн хар тамхийг хууль бусаар Монгол Улсын хилээр нэвтрүүлсэн гэх үйлдлийг нотлогдохгүй байна гэж үзэж, хэрэгсэхгүй болгосон байна. Харин хар тамхийг борлуулах зорилготойгоор олж авсан гэм буруутай хэмээн үзэж, Г.Бямбааг Эрүүгийн хуулийн тусгай ангийн 192 дугаар зүйлийн 192.2-т зааснаар 7 жил хорих ялаар шийтгэж, уг ялыг чанга дэглэмтэй хорих ангид эдлүүлэхээр шийдвэрлэжээ. Харин Д.Сэнгээрэнцэн, Б.Ариунцэцэг нарыг хар тамхийг борлуулах зорилгогүйгээр олж авсан, хадгалсан гэм буруутай гэж үзэж, Эрүүгийн хуулийн 192 дугаар зүйлийн 192.1 дэх хэсэгт зааснаар 6 сар баривчлах ялыг тус тус оногдуулсан байна.
Б.Чимэг
Нийслэлийн шүүх уг хэргийг 2012 оны 12 дугаар сарын 20-ны өдөр хянан хэлэлцээд анхан шатны шүүхийн шийдвэрийг хэвээр үлдээжээ.
Улсын Дээд шүүхийн хяналтын шатны эрүүгийн хэргийн шүүх хуралдаанаар дээрх хэргийг хянан хэлэлцээд анхан болон давж заалдах шатны шүүхийн шийдвэрийг хэвээр үлдээв.
