"Тийн ялгуулсан" хэмээх Усан могой жилийг угтах битүүний билэгт сайн өдөр буюу ирэх сарын 10-ны 17.00 цагт Солонгосын Сөүл хотын "Sejong" соёлын ордонд МУГЖ, дуучин Б.Сарантуяагийн "Аргагүй монгол аялгуу" бие даасан тоглолт болно. Тэрбээр энэхүү тоглолтоо 2011 онд Монгол орны 21 аймаг 24 сум, суурин газар, 2012 онд Казакстан улс, Европын хотуудад мөн Америкийн дөрвөн хотод тоглож байсан юм. Ингээд дуучин Б.Сарантуяа тоглолт болоод "Миний сайхан ээж" дууг шинэчлэн дуулсан талаараа хэвлэлийн бага хурал зарласан юм. Тэрбээр, "Монголын ард түмний зүрх сэтгэлд хоногшсон "Миний сайхан ээж Мяндас зөөлөн уян ээж" хэмээн аялах энэхүү суут бүтээлийг анх 1960 онд МУГЖ С.Цэрэндолгор санаачлан анх удаа Монголын радиогийн фондод дуулж хадгалуулсан түүхтэй. Тэгвэл өнөөдөр энэхүү уран бүтээл продюсер П.Батсайхан санаачлан хөгжмийн зохиолч Чинбат найруулж, Сарантуяа миний бие  дуулснаар ард түмэнд хүрч байна" гэсэн юм.