Монгол улсаас НҮБ-ын Энхийг дэмжих ажиллагаанд үүрэг гүйцэтгэж байгаа цэргийн баг, цэргийн албан хаагчдын хангамжийг нэмэгдүүлэхээр болжээ. Энхийг дэмжих ажиллагаанд оролцож байгаа Үндэсний ахлах төлөөлөгч нарт 1200, төлөөлөгч, холбогч офицерт 800 ам. доллар нэг удаа олгоно.  Харин Цэргийн багийн хувьд гүйцэтгэх үүрэг, ажиллагааны төрөл, хүний тооноос хамаарч ялгавартай байдлаар буюу 1000-2000 ам. доллар олгохоор болсон байна. Журмыг ирэх баасан гараг буюу хоёрдугаар сарын нэгний өдрөөс мөрдөж эхлэх аж.
  
   Уг журам нь Энхийг дэмжих ажиллагаанд үүрэг гүйцэтгэж буй Цэргийн баг, цэргийн алба хаагчдын аюулгүй байдлыг хангах, ар талын хангалт, засвар үйлчилгээг тасралтгүй явуулах, ЦАХ-дын амрах нөхцлийг бүрдүүлэх, тухайн улсад иргэн-цэргийн харилцааны ажиллагаа явуулах, эх орон, Зэвсэгт хүчнээ сурталчлах болон бусад болзошгүй зардлын санхүүгийн эх үүсвэрийг шийдвэрлэх зорилготой юм.

   Энхийг дэмжих ажиллагаанд оролцох тухай хуулийн зохих заалтыг үндэслэн “Энхийг дэмжих ажиллагаанд оролцох Цэргийн баг, цэргийн алба хаагчдын албан хэрэгцээнд мөнгө олгох журам”-ыг Батлан хамгаалахын сайдын тушаалаар баталжээ.