АМГ-ын дарга асан Д.Батхуяг нарын дөрвөн хүнд холбогдох шүүх хурал ШШГЕГ-ын харьяа цагдан хорих 461 дүгээр ангид гурван өдрийн турш үргэлжсэний эцэст шүүх бүрэлдэхүүн өчигдөр 22.00 цагийн үед шийдвэрээ гаргажээ.Хуралд шүүгчээр Б.Цогт, О.Жанчивнямбуу, Ц.Оюунчимэг, улсын яллагчаар С.Алимаа, өмгөөлөгчөөр Б.Ууганбаяр, Б.Энхзаяа, Г.Оюунцэцэг, Ц.Агваандорж, Б.Энх-Эрдэнэ, Д.Батсүх, П.Сугарням, М.Зулзаяа, Ч.Болдбаатар, Б.Баясгалан, П.Батжаргал, М.Алтан-Өлзий нар оролцов.
Хуралдаанаар Д.Батхуяг, С.Жаргалсайхан, Ш.Бат-Ирээдүй нарыг Эрүүгийн хуулийн тусгай ангийн 263.2, 268.2-т зааснаар буруутган шүүж, хорих ял оноосон байна.
Тодруулбал, шүүгдэгч Д.Батхуяг, Л.Даваацогт нар нь бүлэглэн 2009, 2010 онуудад албаны эрх мэдэл буюу албан тушаалын байдлаа урвуулан ашиглаж, Ашигт малтмалын тухай хуулийн холбогдох заалтуудыг зерчин, сонгон шалгаруулалтаар олгох ёстой нийт 108 ширхэг тусгай зөвшөөрлүүдийг бусдад сонгон шалгаруулалтгүйгээр олгож, төрийн байгууллагын /АМГазар/ хуулиар хамгаалагдсан эрх ашигт хүнд хор уршиг учруулсан, мөн шүүгдэгч С.Жаргалсайхан, Ш.Бат-Ирээдүй нартай бүлэглэн "Саусгоби сэндс" ХХК-ийн эзэмшлийн ашигт малтмалын дөрвөн тусгай зөвшөөрлийг Ашигт малтмалын тухай хуульд зааснаар цуцлах тухай дүгнэлт гарсан байхад цуцлах үүргээ хэрэгжүүлэлгүй, тус компанийн ашиг сонирхлын үүднээс үүсñэн нөхцөл байдлыг ашиглан хясан боогдуулах замаар тусгай зөвшөөрлийг сэргээж, С.Жаргалсайханд, "Зэлэм" ХХК-ийн эзэмшилд шилжүүлэн хээл хахууль авсан гэмт хэрэг үйлдсэн байна.
Тиймээс Баянзүрх дүүргийн шүүхээс Д.Батхуягийг Эрүүгийн хуулийн 263 дугаар зүйлийн 263.2, 268 дугаар зүйлийн 268.2 дахь хэсэгт зааснаар төрийн албанд ажиллах эрхийг гурван жилээр хасч, таван сая төгрөгний эд хөрөнгө хурааж, 6 жил 6 сар хорих ял оногдуулж, хорих ялыг чанга дэглэмтэй хорих ангид эдлүүлэхээр, Л.Даваацогтыг Эрүүгийн хуулийн 263 дугаар зүйлийн 263.2, 268 дугаар зүйлийн 268.2 дахь хэсэгт зааснаар төрийн албанд ажиллах эрхийг хоёр жилээр хасч, гурван сая төгрөгний эд хөрөнгө хурааж, 6 жил хорих ял оногдуулж, хорих ялыг чанга дэглэмтэй хорих ангид эдлүүлэхээр, С.Жаргалсайхан, Ш.Бат-Ирээдүй нарыг Эрүүгийн хуулийн 268 дугаар зүйлийн 268.2 дахь хэсэгт зааснаар тус бүр гурван сая төгрөгний эд хөрөнгө хурааж, 5 жил 1 сар хорих ял оногдуулж, хорих ялыг жирийн дэглэмтэй хорих ангид эдлүүлэхээр тус тус тогтоосон байна.
Мөн Эрүүгийн хуулийн 49 дүгээр зүйлийн 49.2-т зааснаар шүүгдэгч нараас 35 сая төгрөгийг хувь тэнцүүлэн гаргуулан улсын орлогод оруулж, хууль бусаар олгосон ашигт малтмалын нийт 107 ширхэг тусгай зөвшөөрлийг хүчингүй болгож шийдвэрлэсэн байна.
Б.Чимэг
Сэтгэгдэл (43)