Төрийн тусгай хамгаалалтын газрын “Их тэнгэр цогцолбор” тусгай үйлчилгээний албаны сантехникийн ажилтан Д.Эрдэнэсайхан Ерөнхий сайд асан С.Батболдынд сантехникийн үйлчилгээ хийж тэдний үнэтэй ваарыг хагалж өрөнд орсон талаар зарим хэвлэлээр гарсан. Мөн  ерөнхий сайд асан С.Батболдын гэргий ихэд уурлаж бухимдан орилж хашгичсан гэж бичсэн байсан.

Тэгвэл сантехникийн ажилтан Д.Эрдэнэсайхан хэвлэлээр гарсан мэдээлэлд залруулга хийн тэр өдөр юу болсон талаараа тайлбарласан байна. Тэрээр хэлэхдээ "2012 оны  тавдугаар сард хамгаалалтын ажилтны дуудлагаар Ерөнхий сайд С.Батболдын их тэнгэр дэх гэрт ажилласан юм. Тэр үед өөрийн санамсар болгоомжгүйгээсээ болж, ойрхон байсан ваарыг унагаад хагалчихсан. Тэгээд унагаж хагалсан ваарныхаа хэлтэрхийг аваачиж Төрийн тусгай хамгаалалтын газрын “Их тэнгэр цогцолбор” тусгай үйлчилгээний албаны удирдлагууддаа харуулсан. Тэгээд би ийм хэрэг хийчихлээ. Энэ ямар үнэ өртөгтэй байдаг юм бол бусдад учруулсан хохирлоо барагдуулъя гэж хүсэлт гаргасан. Тухайн үед гэрийн эзэгтэй төлж барагдуул гэж хашхираагүй.  Харин ч гэрийн эздийн хэн нь ч байгаагүй. Удирдлагууд маань ваар захиалж авчруулаад оруулж өгтөл Х.Отгонтуяа хэрэг явдлын талаар сонсоод “Юун сүртэй юм. Ямар санаатай хагалсан биш. Одоо нэгэнт аваад ирсэн юм чинь би өөрөө төлье тэр сантехникчээр төлүүлээд хэрэггүй шүү" гэж хэлсэн талаар удирдлагууд нь хэлсэн байсан. Би ажлаасаа халагдаагүй өнөөдрийг хүртэл ажлаа хийгээд л явж байна" гэжээ.