Улсын нууцад хамаарах баримт задруулж, гадаадын тусгай албаныханд дамжуулсан хэрэгт буруутгагдаж буй ТЕГ-ын Сөрөх тагнуулын албаны дарга асан хурандаа В.Нямхандыг өнөөдөр Хан-Уул дүүргийн шүүхэд шүүнэ. Түүнийг өнгөрсөн долоо хоногт шүүх байсан ч шүүгдэгч В.Нямхандын өмгөөлөгч Ц.Цэрэнжээ Япон улсад семинарт сууж байгаа, мөн улсын яллагч өөрчлөгдсөн гэх үндэслэлээр өнөөдрийг хүртэл хойшлоод байсан билээ.
    В.Нямхандыг Сөрөх тагнуулын албанд ажиллаж байхдаа төрийн нууцад хамаарах баримт бичгийг хятадуудад задруулж, улмаар 100 сая төгрөгийн гэрээг нууцаар хийсэн гэж хууль хяналтын байгууллага үзсэн байна.
Тиймээс Эрүүгийн хуулийн 79.1-д зааснаар Монгол Улсын иргэн тус улсын тусгаар тогтнол, үндэсний аюулгүй байдал, батлан хамгаалах хүчин чадалд хохирол учруулах зорилгоор гадаад улсын тагнуулын албанд элссэн, төрийн нууцыг гадаад улс, түүний тагнуулын албанд шилжүүлэн өгсөн, Монгол Улсын эсрэг дайсагнасан үйл ажиллагаа явуулдаг гадаад улсын байгууллагатай хамтран ажилласан, дайны байдалд буюу дайн бүхий байдал зарласан үед дайсны талд шилжин орсон гэсэн үндэслэлээр буруутган шүүнэ. Хэрвээ гэм буруутай нь тогтоогдвол арван зургаагаас хорин таван жил хүртэл хугацаагаар хорих ял шийтгүүлэх юм байна.