Нийслэлд өчигдрийн байдлаар менингококкт халдварын найман тохиолдол бүртгэгдэж 3-8 сартай гурван хүүхэд энджээ.
    Менингококкт халдвараар гурван сартайгаас дөрөв хүртэлх насны хүүхдүүд өвчилсөн бөгөөд таван тохиолдол буюу 62.5 хувь нь 7-25 цагийн дараа эмчид хандсан байна. Түүнчлэн хоёр тохиолдолд утсаар эмч зөвлөгөө өгснөөс үүдэн цаг алджээ.

    Менингококкт халдварын өвчлөлийн тархвар зүйн хэтийн төлөвөөр 2013-2014 онуудад бүх аймаг, хотод халдвар нэмэгдэн дэгдэлт хэлбэрээр гарах магадлалтай байгаа тул дараах арга хэмжээг яаралтай авч хэрэгжүүлэхийг Эрүүл мэндийн сайд албан даалгавар гаргасан байна. Үүнд:

Нэг. Халдварт өвчин судлалын үндэсний төвд даалгах нь:

- Менингококкт халдварын өнөөгийн байдал, цаашид авах арга хэмжээний талаар аймаг, нийслэлийн Эрүүл мэндийн газрын дарга, эмч нарт зориулсан аудио хурлыг 3 дугаар сарын 20-ны дотор зохион байгуулах,

- Менингококкт халдвар гарсан нийслэлийн Сонгинохайрхан, Баянзүрх дүүргийн 1-2 хүүхдийн байгууллагыг сонгон хамар залгиурын үрэвсэл илрүүлэх үзлэг, шинжилгээг энэ оны 3 дугаар сарын 25-ны дотор зохион байгуулах,

- Менингококкт халдвартай тэмцэх, сэргийлэх арга хэмжээг эрчимжүүлэх тухай“ Эрүүл мэндийн сайдын 2008 оны 37 тоот тушаалаар батлагдсан заавруудыг хэрэгжүүлэх арга хэмжээг зохион байгуулах, мэргэжил арга зүйн удирдлагаар хангах,

- Менингококкт халдварын тандалтыг эрчимжүүлж, эрт илрүүлэх, хариу арга хэмжээг шуурхай зохион байгуулах, шаардагдах эм, вакцин, оношлуурын хэрэгцээг тооцон нөөцлөх,

- Менингококт халдвараас сэргийлэх энгийн аргууд/ хоолой зайлах, хамар, залгиурыг цэвэрлэх, дархлаа сайжруулах... гм/, өвчний анхны шинж тэмдгүүдийн талаар хүн амд сурталчлах арга хэмжээг эрчимтэй зохион байгуулах.

Хоёр. Аймаг, нийслэлийн Эрүүл мэндийн газрын дарга нарт даалгах нь:

- Менингококкт халдварын мэдээлэл, тандалт, эрт сэрэмжлүүлэх, хариу арга хэмжээний төлөвлөгөөг гарган бэлэн байдлыг хангах.

- Хүүхдийн байгууллагад хамар, залгиурын үрэвсэл илрүүлэх, эрүүлжүүлэх арга хэмжээг зохион байгуулах,

- Эрүүл мэндийн байгууллагуудын эмч, сувилагч нарт менингококкт халдварын оношлогоо, эмчилгээний талаарх сургалтыг энэ оны 3 дугаар сард багтаан зохион байгуулах,

- Албан даалгаврын хэрэгжилтийг энэ оны 5 дугаар сарын 20-ны дотор гарган Бодлогын хэрэгжилтийг зохицуулах газарт ирүүлэх.