ҮХААЯ-аас өнөөдөр нөөцийн махны талаар мэдээлэл хийлээ. Одоогийн байдлаар нөөцийн махыг нийслэлийн хэмжээнд 9200 тонн, Дархан-Уул аймагт 1000 тонн, Эрдэнэ хотод 1016 тонныг бэлтгэсэн бөгөөд дээрх гурван хотын хэмжээнд 62 тонныг худалдаад байна. Нийслэл хотод одоогоор 238 цэгээр дамжуулж нөөцийн мах борлуулж байгаа бол цаашид 350 цэг болгон өргөжүүлэхээр ажиллаж байгаа аж. Энэ жилийн хувьд нөөцийн махыг 2-3 кг-аар жижиглэн савласан бөгөөд долдугаар сарын 15-ныг хүртэл тасралтгүй хангах юм байна. Нөөцийн мах чанарын шаардлага хангахгүй байгаа талаар иргэд ярьж байгаа. Тэгвэл чанарын тал дээр айх зүйлгүй бусад махны л адил байгаа гэдгийг тэд мөн сануулсан юм.

Одоогийн байдлаар жижиглэсэн 1 кг үхрийн мах- 5950 төгрөг, ямааны мах-4850 төгрөг, хонины мах-5750 төгрөгөөр тус тус борлуулж байна. Махаа гулуузаар авахыг хүссэн иргэдэд зориулж амралтын өдрүүдээр “Нарантуул-2”, “Хүчит шонхор”, “Хар хорин” захуудаар хонь, ямааны гулууз, үхрийн өрөөл махыг 4400-5800 төгрөгөөр худалдах юм байна.

Иргэд нөөцийн махтай холбоотой санал гомдлыг 88046551, 88046552, 88046553 дугаарын утсаар хүлээн авч байгаа гэнэ.