ЭМЯ, Япон улсын Сисмекс корпораци хоорондын байгуулсан хамтын ажиллагааны гэрээнд нэмэлт өөрчлөлт оруулах ёслолын ажиллагаа өнөөдөр Эрүүл мэндийн яамны хурлын танхимд боллоо.Энэ үеэр Сисмекс корпорациас Улсын гуравдугаар төв эмнэлэгт биохимийн лабораторийн иж бүрэн тоног төхөөрөмж хүлээлгэн өгөв.
Эрүүл мэндийн сайд Н.Удвал хэлэхдээ, "Эрүүл мэндийн лабораторийн тусламж, үйлчилгээ нь эрүүл мэндийн системийн гол хэсэг юм. Өвчлөлийн хяналт, оношилгоо, урьдчилан сэргийлэлт, нийгмийн эрүүл мэндэд чиглэсэн бүхий л үйл ажиллагааны үр дүн бол найдвартай лабораторийн тусламж үйлчилгээнээс шалтгаалдаг. Лабораторийн тусламж, үйлчилгээний ач холбогдол өсөн нэмэгдэж, нотолгоонд тулгуурласан эмчилгээний болон нийгмийн эрүүл мэндийн тусламжийн шаардлага ихсэхийн хэрээр лабораторийн тусламж, үйлчилгээг бэхжүүлэх шаардлагатай байгаа" гэлээ. Тэрээр эрүүл мэндийн лабораторийн тусламж, үйлчилгээг хөгжүүлэх 2010-2015 оны стратеги төлөвлөгөөг хэрэгжүүлэх, клиник лабораторийн оношилгоо, шинжилгээний чанарыг сайжруулах зорилгоор ЭМЯ, Япон улсын Сисмекс корпораци 2008 оны зургадугаар сарын 2-ны өдөр “Монгол улсад лавлагаа лаборатори, гематологийн чанарын гадаад хяналтын тогтолцоо бүрдүүлэх” чиглэлээр хамтран ажиллах гэрээ байгуулан чанарын баталгаажилтын лавлагаа лабораторид гематологийн стандарт 3 анализаторыг буцалтгүй тусламжаар суурилуулж 2008 оны 7 дугаар сард анхны чанарын гадаад үнэлгээг явуулснаас хойш 2012 оны 11 дүгээр сарын 12-ныг хүртэл гематологийн шинжилгээний 10 дахь удаагийн, биохимийн 4 дэх удаагийн чанарын гадаад үнэлгээг амжилттай явуулж ирсэн гэдгийг цохон хэлсэн юм. Цаашид хүсэл зорилго нэгтэйгээр Монгол улсад Биохимийн болон Гематологийн шинжилгээний чанарын гадаад хяналт болон лавлагаа лабораторийн үйл ажиллагааг тогтвортой сайжруулахын төлөө хамтран ажиллана гэдэгт гүнээ итгэж буйгаа илэрхийлэв.
Гэрээ байгуулж хамтарч ажилласан 5 жилийн хугацаанд чанарын гадаад үнэлгээ явуулсан тухай бүр ЭМЯ, Японы Сисмекс корпорацитай хамтран нийт лабораторийн эмч, мэргэжилтний дунд олон улсын сургалт семинар зохион байгуулан чанарын гадаад үнэлгээний дүн, тайланг тавьж, хяналтад оролцогсдод гэрчилгээ, үнэлгээний хуудас, тайлангийн номыг хүргүүлж ирсэн. Үүний зэрэгцээ Сисмекс корпораци нь лабораторийн эмч нарын хүсэлтээр тэдэнд тулгамдаж буй сэдвээр, лабораторийн чанарыг сайжруулах, олон улсын стандартад нийцсэн чанартай шинжилгээ хийх талаар Японы нэр хүндтэй мэргэжилтнүүдийг ирүүлж сургалт явуулж байгаа нь энэ чиглэлээр хамтран ажиллаж байгаа бидэнд ихээхэн хэмжээний хөрөнгө оруулалт болж байгаа төдийгүй, манай лабораторуудын чадамж болон лабораторийн шинжилгээний чанарыг сайжруулахад ихээхэн түлхэц өгч байна гэж бодож байна. Тухайлбал: Гематологийн чанарын гадаад үнэлгээнд анх 58 лаборатори хамрагдаж байсан бол 10 дахь удаагийн чанарын гадаад үнэлгээнд 148 лаборатори, биохимийн анхны чанарын гадаад үнэлгээнд 50 лаборатори хамрагдаж байсан бол 143 лаборатори болж өссөн байгаа байдлыг харахад энэ үйл ажиллагаа нь хэр их хэрэгцээтэй, шаардлагатай байгааг харуулж байна. Мөн Улсын гуравдугаар төв эмнэлэг дээр байрлаж буй чанарын баталгаажилтын лавлагаа лабораторид биохимийн стандарт анализаторыг буцалтгүй тусламжаар суурилуулж өгч байгаа нь бидний хувьд чанартай шинжилгээний оргил руу дөхөхөд том алхам болно гэдгийг албаны хүмүүс хэлсэн юм.
Гэрээнд гарын үсэг зурах ёслолын ажиллагаанд Эрүүл мэндийн сайд Н.Удвал, ЭМЯ-ны Төрийн нарийн бичгийн дарга Ж.Хатанбаатар, Сисмекс корпорацийн Тэргүүн дэд захирал ноён Масаёши Хаяши, тус корпорацийн төлөөлөл, Япон Улсын Элчин сайдын яамны төлөөлөл болон бусад холбогдох албаны хүмүүс оролцлоо.
