Өдөр ирэх тусам хүрээгээ тэлж буй он-лайн сэтгүүл зүй, түүний сэтгэгдлийн хэсгийг хэрхэн зохицуулах вэ гэсэн асуудал олон нийтийн анхаарлыг татаад байсан. Мэдээ, мэдээллийн доор сэтгэгдэл бичихдээ бусдын нэр хүндэд халдах, гүтгэн доромжлох нь газар авсан тул Харилцаа холбооны зохицуулах хороо болон мэдээллийн сайтуудын холбоод хамтран сэтгэгдлийг зохицуулах шинэ журам гаргасан нь өнөөдрөөс хэрэгжиж эхэллээ.

  Энэ журмын гол онцлог нь төр, засгаас сайтын сэтгэгдэлд хяналт тавихгүй бөгөөд Мэдээллийн сайтуудын ассоциаци, Монголын сайтуудын холбоо зэрэг төрийн бус байгууллагууд өөрийн гишүүн сайтууд нь уг журмыг хэрхэн хэрэгжүүлж байгааг хянаж, шаардлага тавих юм. Хэрэв тантай холбоотой мэдээллийн доор, таныг гутаан доромжилсон, гүтгэсэн өнгө аястай сэтгэгдэл орсон байвал та тухайн веб сайтын холбоо барих хэсэгт хандаж устгуулах эрхтэй.

  Шинэ журмын дагуу мэдээллийн сайтууд үгийн шүүлтүүр хэрэглэх бөгөөд сэтгэгдэл хэсэгт бусдыг гутаан доромжилсон өнгө аястай, бүдүүлэг үг хэрэглэвэл тэр нь **** тэмдэглэгээгээр харагдах юм. Уг үгийн шүүлтүүрийн санд одоогоор 200 үг багтаж байгаа бөгөөд цаашид ч нэмэгдүүлэх боломжтой гэж үзэж байгаа.. Мөн хэрэглэгч сэтгэгдлийн талбарт бичихдээ заавал username  буюу хэрэглэгчийн нэр гэсэн хэсэгт дурын нэр, и-мэйл хаягаа бичиж нэвтрэх юм. Өмнө нь Засгийн газраас гаргасан тогтоолд сэтгэгдэл бичихдээ заавал регистерийн дугаараар бүртгүүлэх ёстой гэж заасан байсныг олон нийт болон мэдээллийн сайтууд шүүмжилж, эрс эсэргүүцсэн билээ.