Эрүүл мэндийн сайд Н.Удвал “Бөөрний өвчинтэй тэмцэх дэлхийн өдөр”-ийг тохиолдуулан өнөөдөр Улсын гуравдугаар төв эмнэлэг дээр зохион байгуулагдсан “Бөөрний өвчнөөс урьдчилан сэргийлэх орчин үеийн оношилгоо, технологийн аргууд” сэдэвт сургалтын нээлтэд оролцож үг хэллээ.

Тэрээр юуны түрүүнд сургалтад хамрагдаж буй эмч, мэргэжилтнүүдэд хандан бөөрний өвчинтэй тэмцэх, бөөрний өвчин эмгэгтэй хүмүүст үзүүлэх тусламж үйлчилгээний хүртээмж чанарыг сайжруулахын тулд хувь нэмрээ оруулан ажиллаж байгаад талархал илэрхийлсэн юм.

Жил бүрийн “Бөөрний өвчинтэй тэмцэх дэлхийн өдөр” нь өөрийн сэдэвтэй байдаг бөгөөд манай оронд 2009 онд анх тэмдэглэж эхэлсэн байна. Тухайлбал, 2010 онд “Чихрийн шижингээс хамгаалснаар бөөрөө хамгаалъя”, 2011 онд “Зүрхээ хамгаалснаар бөөрөө хамгаалъя”, 2012 онд “Бөөрөө бэлэглэснээр амьдрал бэлэглэе” зэрэг нэрийн дор амжилттай зохион байгуулж байсан бол энэ жил “Бөөрний цочмог гэмтлээс сэргийлье” нэрийн дор зохиогдож байгаагаараа онцлог болж буйг Сайд сонордууллаа.

Олон улсын бөөр судлаачдын нийгэмлэгийн мэдээгээр өнөөдөр дэлхийн хэмжээнд 600 сая хүн бөөрний архаг өвчтэй ба энэ тоо цаашид хэд дахин нэмэгдэх хандлагатай байна. Манай орны хувьд бөөрний өвчин эмгэг нь сүүлийн 10 жилийн байдлаар нийт хүн амын өвчлөл дотор 3 дугаарт орж, хэвтэн эмчлүүлэх шалтгаан дотор тэргүүлэх байр эзэлсээр ирснийг дурдаад Дэлхийн Эрүүл Мэндийн Байгууллага болон бусад төсөл хөтөлбөрүүдтэй хамтран эмч, эмнэлгийн ажилтнуудыг сургах, оношилгоо эмчилгээний стандарт, хөтөлбөрийг шинэчлэх, амьдралд нэвтрүүлэх, эмнэлгийн тусламж үйлчилгээний чанар хүртээмжийг сайжруулах талаар олон талт арга хэмжээг амжилттай авч хэрэгжүүлж байгааг хэлсэн юм. Үүний нэг жишээ нь “Бөөр хамгаалах дэлхийн өдөр”-ийг тохиолдуулан уг өвчний оношлогоонд зориулан хамгийн орчин үеийн аппарат, оношлуурыг Япон улсын Sysmex компаниас өнөөдөр хандивласан гэв.

Цаашид ЭМЯ-аас бөөрний өвчинтэй тэмцэх үндэсний хөтөлбөр боловсруулж, хэрэгжүүлэх, энэ чиглэлийн эмч, эмнэлгийн ажилтнуудыг сургаж бэлтгэх, уг өвчний бүртгэл, хяналтын тогтолцоог сайжруулан нарийн мэргэжлийн тусламж үйлчилгээний стандартыг боловсруулж хэрэгжүүлснээр бөөрний өвчин эмгэгтэй хүмүүст үзүүлэх тусламж үйлчилгээний хүртээмж чанар сайжран дэлхий дахины хандлагатай хөл нийлүүлэн алхах боломжтой болно гэдэгт итгэлтэй байгаагаа Эрүүл мэндийн сайд илэрхийллээ.

Тус сургалтад ДЭМБ-ын суурийн төлөөлөгч Нюнт-Ю Сой, Нийслэлийн эрүүл мэндийн газрын хамт олон, бүх өрхийн эрүүл мэндийн төвийн эмч нар, аймаг, нийслэлийн дотор болон бөөрний эмч нар оролцсон байна.