2011 оноос хойш шалгагдсан ТЕГ-ын Сөрөх тагнуулын албаны дарга асан, хурандаа В.Нямхандад холбогдох хэргийг өчигдөр Хан-Уул дүүргийн шүүхээс хэрэгсэхгүй болгож шийдвэрлэлээ.
    2011 оноос хойш шалгагдсан ТЕГ-ын Сөрөх тагнуулын албаны дарга асан, хурандаа В.Нямхандад холбогдох хэргийг өчигдөр Хан-Уул дүүргийн шүүхээс хэрэгсэхгүй болгож шийдвэрлэлээ.
     Өмнө нь гурван ч удаа мөрдөн байцаалтад буцаж байсан уг хэргийг гэнэт хэрэгсэхгүй болгосон нь олны анхааралд өртөв.

    Хан-Уул дүүргийн шүүхийн шийдвэрийн талаар Нийслэлийн шүүхээс мэдээлэхдээ “Гэмт хэргийн бүрэлдэхүүнгүй учраас хэргийг хэрэгсэхгүй болгож, цагаатгасан” гэх тайлбарыг хийлээ. Тэгэхээр гэмт хэргийн бүрэлдэхүүнгүй хэрэг бүхэл бүтэн хоёр жилийн турш шалгагдаж, гурвантаа мөрдөн байцаалтад буцаж байжээ.

    Үүнээс харахад Е.Сагсай прокурорын хоёр жилийн турш шалгасан хэргийг В.Нямхандын хэрэгт томилогдсон прокурорын сарын дотор хэрэгтэй нь танилцаад шүүхээр шийдвэрлүүлчихлээ. Гэхдээ бүр хэрэгсэхгүй болгож, цагаатгуулав.

    Хэрэгт анхнаас нь Нийслэлийн прокурорын орлогч асан Е.Сагсай хяналт тавьж байсан. Гэвч тэрээр өнгөрсөн сард Сүхбаатар дүүргийн Ерөнхий прокурор болж албан тушаал буурсан. Хэдийгээр өөрийн хүсэлтээр уг албан тушаалд очсон гэх ч зарим нэг учир мэдэх хүмүүс хяналт тавьж байсан хэргүүдээсээ болж албан тушаал буурсан гэж мэдээлж байв. Ялангуяа В.Нямхандын хэргээс болж, түүний албан тушаалыг сольсон гэлээ. Энэ нь ч ортой байх магадлал өндөр.

    Е.Сагсай В.Нямхандын хэргийг анх шалгахдаа түүнд Эрүүгийн хуулийн тусгай ангийн 87.2 буюу төрийн нууцад хамаарах баримт бичгийг итгэмжлэн хариуцсан төлөөлөгч задруулсан гэх үндэслэлээр буруутган шалгаж байжээ. Харин хавтаст хэргийг шалгах явцад хэргийн зүйлчлэл өөрчлөгдөн эх орноосоо урваж гадаадын тагнуулын байгууллагад улсын нууц баримт материал дамжуулсан хэмээн Эрүүгийн хуулийн тусгай ангийн 79.1-д зааснаар Монгол Улсын иргэн тус улсын тусгаар тогтнол, үндэсний аюулгүй байдал, батлан хамгаалах хүчин чадалд хохирол учруулах зорилгоор гадаад улсын тагнуулын албанд элссэн, төрийн нууцыг гадаад улс, түүний тагнуулын албанд шилжүүлэн өгсөн, Монгол Улсын эсрэг дайсагнасан үйл ажиллагаа явуулдаг гадаад улсын байгууллагатай хамтран ажилласан, дайны байдалд буюу дайн бүхий байдал зарласан үед дайсны талд шилжин орсон гэсэн зүйл ангиар буруутгаж эхлэв.

    Тиймээс В.Нямхандад 16-25 жилийн ял төлөвлөөд байжээ.

    Гэвч хоёр жил гаруйн хугацаанд шалгагдсан хэрэг улсын яллагч Е.Сагсайг хяналт тавихаа болимогц сарын дотор шийдэгдлээ. Тэгэхээр Е.Сагсай В.Нямхандын хэргээс болж албан тушаал буурсан гэх мэдээлэл ортой бололтой. Түүнийг уг албан тушаалаас бууруулснаар В.Нямхандын хэргийг хэрэгсэхгүй болголоо гэж үзэж болохоор.


    В.Нямханд нь хуульч мэргэжилтэй. Түүнийг Үндэсний аюулгүй байдлын зөвлөлийн Ажлын албаны дарга Б.Хурц анх  Тагнуулын ерөнхий газрын Сөрөх тагнуулын хэлтсийн орлогч даргаар томилж байжээ. Гурван жил тус байгууллагад хамт ажилласны эцэст Б.Нямханд Б.Хурцыг авлигын хэрэгт холбогдож ажлаасаа гарахад хамт гарсан байдаг.