Монголдоо “ганц” хэмээн монополь эрх эдэлдэг “МИАТ” компани  идэж уусан, ажлын хариулага алдсан гэх яриаг байнга дагуулах болов.
     “МИАТ”-ын хуучин дарга нар олон жилийн турш Дайны эрсдлийн даатгал нэрээр мөнгө угааж, аалзны тор шиг авлигын сүлжээ үүсгэсэн нь ил болж байна. Экс дарга нар нь хэрэгт холбогдсны дараа “ийм хүмүүсээр удирдуулж байжээ, эвий” гэж толгойг нь илээд “Үндэсний агаарын тээвэрлэгч” гэх том статус олголоо. Гэтэл удаа ч үгүй ажлын хариуцлага алдаж 100 гаруй хүнийг Шереметьевогийн нисэх буудлын хүйтэн шалан дээр хоёр хонуулчихлаа. Ингэснийхээ төлөө тэд зүгээр л уучлалт гуйгаад өнгөрөх бололтой.

   Онгоцны дугуй хагарснаас Москвад зорчигсод саатсан ийм явдал болсон нь үнэн. Гэхдээ яагаад ийм том байгууллагын, олон хүний амь тээсэн онгоц аюулгүй байдлыг хангах нөөц дугуйгүй явав? гэдгийг 24tsag.mn нэхэн сурвалжиллаа. “МИАТ” компани өчигдөр мэдэгдэл гаргахдаа, “Агаарын хөлөг цаг агаарын таагүй үзэгдэл, цасан шуурга болон хуваарьт бус техник үйлчилгээний улмаас Москва хотод түр саатсан” гэж мэдэгдсэн юм.

   Харин эх сурвалжийн мэдээлснээр онгоцны нэг нисгэгч нь байгууллагынхаа ашгийг нэмэх “мэргэн” санаа гаргаснаас ийм зүйл болжээ. Тэр "мэргэн" санаа нь гэвэл хүнд жинтэй хоёр том дугуйныхаа оронд хоёр зорчигч авч явах аж. Энэ саналыг нь холбогдох удирдлагууд нь дэмжиж Берлин-Москва-Улаанбаатар чиглэлийн ОМ136 онгоцонд эхний “туршилт” явуулсан нь ийнхүү олон иргэнд чирэгдэл учруулжээ. Үүнийгээ залруулахын тулд Москва руу нөөц дугуй илгээсэн ч ОХУ-ын хил дээр гацчихаад байгаа юм.

  Ер нь МИАТ-ынхан илүү зорчигч авч явдаг, оюутнуудын суудлыг өөр хүнд зарчихдаг гэх хэл аманд байнга өртөж байдаг. Хамгийн сүүлд 2012 оны 12-р сард Берлинээс Москвагаар дамжин нисч байсан 15 оюутныг бусад зорчигчдоос ялган буулгаж ОХУ-ын Шереметьево нисэх буудалд үлдээсэн явдал гарсан. Оюутнууд үүнд гомдол гаргаснаар Москва дахь төлөөлөгч нь хариуцлагаа хүлээж ажлаасаа халагдаж байсан удаатай.

   Ингэж хоёр дугуйгаар хоёр хүн сольсноор МИАТ компани ашиг олох биш харин ч их хэмжээний алдагдалд оржээ. Эх сурвалжийн мэдээлснээр “ОМ136” онгоцны дугуйг солих, зорчигчдыг Улаанбаатарт авч ирэхэд даруй 400 мянган ам. доллар буюу 560 гаруй сая  төгрөгөөр хохирсон байна. Анх А.Гансүх сайд Зам тээврийн сайдаар томилогдоод “МИАТ” компанид бүтцийн өөрчлөлт хийж, илүү  орон тоог цомхотгож, зарим дарга нарын цалинг хассанаар 2,4 тэрбум төгрөгийн хэмнэлт хийлээ гэж байсан. Гэтэл өнөөдөр аюулгүй байдлын дүрэм зөрчиж, хоёр хүний мөнгө илүү авах гэсэн “шунал”-аасаа болж хэд дахин илүү алдагдалд орсон байна. Гадны менежерүүдийг өндөр үнээр ажиллуулж байсан, том дарга нар нь 1,2 сая төгрөгийн цалин голж таван саяын нэмэгдэл авдаг байсан гээд төрийн мөнгөөр “тоглож” байгаа МИАТ нэг л биш. Хуучин дарга нар нь хуулийнхний өмнө мэдүүлгээ өгч байна. Тэгвэл одоо ажлаа сайжруулж, хэрэггүй зүйлд мөнгө үрдэг хуучин зангаасаа салах цаг болжээ. Үүнд салбарын сайд, хуулийнхан хяналт тавиасай. МИАТ-ийн онгоцоор үйлчлүүлэгчдэд дахиад ийм явдал давтагдах вий гэсэн айдаст хүлэгдэхгүй байхын арга алга.