Засгийн газраас гаргасан 28 дугаар тогтоолоор төмөр замын эхний ээлжийн санхүүжилтийн асуудлыг шийдвэрлэж, 2013 онд хийх ажлыг тодорхойлсон. Уг ажлын хүрээнд техникийн болон санхүү, хуулийн зөвлөхийг сонгон шалгаруулах ажил багтсан юм. Тиймээс тендерийг өнгөрсөн хоёрдугаар сарын 8-нд дээрх сонгон шалгаруулалтыг олон улсад нээлттэйгээр зарласан бөгөөд өнөөдөр тендерийг нээх хугацаа хуулийн дагуу тохиож байна.

Техникийн зөвлөх компани төмөр замын гол зургийг гаргах юм. Техникийн зөвлөхөөр ажиллах саналыг 16 компани ирүүлсэн бол хуулийн болон санхүүгийн зөвлөхөөр ажиллахаар баримт бичгээ ирүүлсэн тус бүр дөрвөн компани байгаа аж. Үнэлгээний хорооноос гаргасан хураангуй жагсаалтад техникийн зөвлөхөөр ажиллах санал ирүүлсэн компаниудаас долоон компанийг оруулжээ. Нөгөө хоёр тендерийн хураангуй жагсаалтад тус бүр дөрвөн компани орсон аж. Үнэлгээний хорооныхон хураангуй жагсаалтад орсон компаниудын тендерийн материалыг судлан шалгаруулалтаа хийх юм байна.

Олон улсад нээлттэй зарласан эл  тендерт нийт найман улсаас санал иржээ. Тухайлбал Япон, Солонгос, АНУ, Австрали, Канад, Англи  зэрэг улсын мэргэжлийн компаниуд тендерт материалаа ирүүлсэн байна. Харин санхүү, хуулийн зөвлөхийн тендерт олон улсын чанартай компаниудаас “BNP”, “PWS”, “KPMG”,  “Baribas”  зэрэг зөвлөх компани оролцож байгаа аж.

 “Чингис” бондын мөнгөнөөс 200 сая ам.долларыг “Шинэ төмөр зам” төслийн санхүүжилтэд зориулахаар шийдвэрлэсэн бөгөөд эхний ажлууд ийнхүү өрнөж эхэллээ. Дээрх шалгаруулалтыг хийхдээ нэг хүний шийдвэрээр бус үнэлгээний хорооны гишүүн бүрийн тус тусдаа хийсэн дүгнэлтийг үндэслэн  шалгаруулалтаа хийх юм байна.
Түүнчлэн төрөөс төмөр замын талаар баримтлах бодлогод нийтдээ 5630 км төмөр замыг гурван үе шаттайгаар барьж байгуулахаар тусгасан.  Монголын төмөр зам комипани нэг, хоёрдугаар үе шатны 1800 км төмөр замыг барих юм.  Одоогийн байдлаар Тавантолгой, Гашуунсухайт чиглэлийн  төмөр замын ТЭЗҮ болон зураг төсөл бэлэн болсон учраас энэ жил дээрх замын барилгын ажлыг эхлүүлэхээр зэхэж байна. Тавантолгойгоос зүүн тийш чиглэсэн төмөр замын ТЭЗҮ-ийг боловсруулах, барилгын ерөнхий гүйцэтгэгчийг сонгон шалгаруулах,техникийн  баримт бичгийг боловсруулж дуусгах ажлуудыг багтаан хийхээр төлөвлөсөн.

Одоогоор төмөр замын төсөлд хөрөнгө оруулах санал авах, гадаад дотоодын хөрөнгө оруулагчидтай хэлэлцээ хийх үүрэг бүхий ажлын хэсгийг байгуулаад байна. Тус ажлын хэсгээс төмөр замын төсөлд хөрөнгө оруулах  компаниудыг урьсан урилгыг “Файнэншл таймс Воурлд” сонинд гаргажээ. Уг урилгын дагуу дотоодын 6, гадны 14 буюу нийт 20 компани санал ирүүлсэн байна.

Дээрх ажлын хэсэг эдгээр компанийн материалтай танилцаж судалсаны дараа чадамжаар нь эрэмбэлэн шалгаруулалтаа хийх аж.