Баянхонгор аймгийг жишиг аймаг болгон хөгжүүлэх хөтөлбөрийн хүрээнд мах боловсруулах үйлдвэр байгуулахаар болж үйлдвэрийн барилгын ажил 50 хувийн гүйцэтгэлтэй явж байна.
    Үйлдвэр ашиглалтад орсноор бүс нутагт 50 орчим ажлын байр шинээр бий болж, иргэдийг баталгаатай хүнсээр хангах боломж бүрдэх төдийгүй аймгийн төсөвт тодорхой хэмжээний хувь нэмэр оруулах юм.

Үйлдвэрийн багтаамж, ажиллах хүч өдөрт 100 бод, 250 бог мал нядлах хүчин чадалтай бөгөөд гүн хөлдөөх зоорь нь 400 тоннын хүчин чадалтай байхаар төлөвлөжээ. Мах боловсруулах үйлдвэр нь өлөн гэдэс, хиам болон хагас боловсржуулсан бүтээгдэхүүн боловсруулах цехүүдтэй байх аж.

Баянхонгор аймгийн эдийн засгийн үндэс нь хөдөө аж ахуйн салбар бөгөөд мал аж ахуй голлох байр эзэлдэг. Аймгийн дотоодын нийт бүтээгдэхүүний 80 орчим хувийг хөдөө аж ахуйн салбар үйлдвэрлэж байна. Сүүлийн таван жилд тариалан эрхлэгчдийн тоо эрс өсч байгаа бөгөөд тодруулбал, аж ахуйн нэгж 17, өрхийн тоо 955-аар тус тус өссөн үзүүлэлт байгаа юм. Цаашдаа  цагаан идээ, мах, сүүг монгол аргаар бэлтгэж ахуйн хэрэгцээндээ ашиглаад зогсох биш боловсруулж, бүтээгдэхүүн  үйлдвэрлэвэл аймгийн эдийн засаг, хүн амын амьжиргааны түвшин дээшлэх боломжтойг албаныхан хэлж байна.

Баруун аймгийн малчин өрхүүд малаа Улаанбаатарт аваачиж худалдан борлуулахын тулд 600-1500 орчим километр замыг туулан, тууварлаж очдог байна. Энэ урт замыг туулах нь малын тарга тэвээргийг алдагдуулж, малын үнийг бууруулах хэмжээнд хүргэдэгт малчид байнга гомдолдог. Мөн тэд малаа борлуулахын тулд Улаанбаатарт 7-30 хоног саатан, зарим тохиолдолд малаа борлуулж чадахгүй байх үе ч тулгардаг байна.
Харин Баянхонгор аймагт мах боловсруулах үйлдвэр байгуулснаар Баруун бүсийн аймгуудын малчдын малыг харьцангуй ойрхоноос худалдан авч, тэнд нь нядлан эцсийн бүтээгдэхүүн үйлдвэрлэж орон нутгийн хэрэгцээг хангах юм. Түүнчлэн нядалсан махаа ОХУ руу шууд экспортолж, гадаадын зах зээлийг ашиглан орлогыг нэмэгдүүлэх боломж нээгдэх аж.