Бааварын түлэгдэж байх үеийн камерийн бичлэгийг дэлгэхийг олон нийт, Бааварын ар гэрийнхэн тэр байтугай Ерөнхий сайд хүртэл ШШГЕГ-ынхнаас хүслээ. Гэвч ШШГЕГ-ынхан үүнд олон янзын тайлбар хийж байна.
    Бааварын түлэгдэж байх үеийн камерийн бичлэгийг дэлгэхийг олон нийт, Бааварын ар гэрийнхэн тэр байтугай Ерөнхий сайд хүртэл ШШГЕГ-ынхнаас хүслээ. Гэвч ШШГЕГ-ынхан үүнд олон янзын тайлбар хийж байна.

    ШШГЕГ-аас Бааварын ар гэрийнхэнд “Гал гарах үед камер ажиллаагүй байсан” гэх тайлбарыг өгсөн бол сэтгүүлчдэд “Дотоод журмын дагуу бичлэгийг олон нийтэд дэлгэх хориотой” гэсэн юм. Гэтэл Ерөнхий сайд Н.Алтанхуягт “Бичлэг алга болсон”, харин Хууль зүйн дэд сайд Э.Эрдэнэжамьяанд “Тухайн үед бичлэг унтраастай байсан” гэжээ. Уг тайлбарын аль нь үнэн болохыг мэдэхгүй суутал ШШГЕГ-ын дарга Б.Ядамдорж “Гал гарах үеийн бичлэг устсан байна билээ. Тиймээс бичлэгийг сэргээнэ” хэмээв. ШШГЕГ-аас яагаад ийм олон тайлбар өгөөд байна вэ. Үүнээс харахад Бааварыг гадны нөлөөтэй шатаасан юм биш үү гэсэн хардлага төрүүлэхээр байна. Үгээ нийлүүлж амжилгүй, олон янзын тайлбар өгөхийн цаад учир нь юу вэ.

    Мэдээж Хууль зүйн сайд Х.Тэмүүжин гадаадаас ирээд энэ асуудалд албан ёсоор тайлбар өгөх биз. Харин түүний эзгүйд дэд сайд Э.Эрдэнэжамьяан Хууль зүйн яамнаас ажлын хэсэг байгуулан, уг хэрэгт ажиллах үүрэг өгсөн юм.

Энэ талаар Хууль зүйн дэд сайд Э.Эрдэнэжамьяангаас тодрууллаа.

-Бааварын камерийн бичлэгийг дэлгэхийг олон нийт шаардаж байна. Гэтэл ШШГЕГ-аас янз бүрийн тайлбар өгөөд байх юм?

-Өчигдөр би яамнаас ажлын хэсэг байгуулах үүрэг өгч, ажлын хэсэг хэргийн газарт ажиллаад ирсэн. Өнөөдөр надад ажлаа тайлагнах байх.

-Мэдээж камерийн асуудлыг шалгасан байх?

-Тухайн үед өрөөний камер нь унтраастай байсан гэсэн асуудлыг ярьж байна. Харин коридорын камер ажиллаж байсан гэнэ. Мэдээж камер унтраастай байна гэдэг сонин л юм. Уг нь бол өрөөний камер унтрах ёсгүй. Тиймээс Хууль зүйн яамны хяналт шалгалтынхан энэ асуудлыг шалгана.

-Унтраастай байсан бол санаатай юм биш үү?

-Санаатай юу, санаагүй юу гэдгийг шалгаж тогтооно.

-ШШГЕГ-ынханд хариуцлага тооцох уу?

-Хариуцлага тооцдог хүн нь би биш. Сайд эзгүй байна.

Хууль зүйн дэд сайд нь ийм тайлбар өгч байна.

Тиймээс ШШГЕГ-ын дарга Б.Ядамдоржоос мөн тодрууллаа.

-Бааварын бичлэгийг алга болгосон гэх мэдээллийг танайхаас Ерөнхий сайдад өгсөн байна?

-Алга болсон юм байхгүй. Зөвхөн гал гарсан өдрийн бичлэг л уншигдахгүй байна. Тиймээс камерийн бичлэгийг сэргээхээр ажиллаж байна.

-Хариуцлага алдсан нөхдөд арга хэмжээ авсан уу. Хууль зүйн дэд сайд би хариуцлага тооцдог хүн биш гэсэн хариулт өгсөн?

-Хариуцлага алдсан Цагдан хорих 461 дүгээр ангийн орлогч дарга, хянагчид, камер дээр сууж байсан алба хаагчдыг ажлаас нь халсан.

Холбогдох албаны хүмүүсийн тайлбар ийм. Харин Ерөнхий сайд Н.Алтанхуяг өчигдөр сэтгүүлчидтэй уулзах үеэр ийм тайлбар өгсөн юм. 

-Хорих ангид шатсан Бааварын хэрэгт та тайлбар өгөөч?

-Хаана, хаанаа ил тод байх хэрэгтэй. Тиймээс би ШШГЕГ-ынханд камерийн бичлэгийг нийтэд ил болго гэж хэлсэн. Гэтэл бичлэгийг алга болгосон гэсэн. Бичлэгийг л харуулах ёстой. Хэрвээ харуулж чадахгүй бол ажлаас нь халаад явна. Би ямар манаач юм уу. Бүгдтэй нь тулж ажиллах боломжгүй байна. Та бүхэн энэ бүхнийг ил тод хэлэх хэрэгтэй гэсэн билээ.

    Юутай ч ШШГЕГ-ынхны үг зөрсөөр. Бүр Ерөнхий сайддаа хүртэл ийм тайлбар хийж байна. Энэ одоо юу болж байна вэ.

    Бааварын шатсан тухай мэдээ цацагдмагц “Баавар өөрийгөө шатаахыг завдсан” хэмээн мэдэгдсэн ШШГЕГ-ынхан үүнийгээ баталж чадсангүй. Батлах нь битгий хэл, ганц камерийн бичлэгт дээр дооргүй олон янзын тайлбар өгч олныг төөрөгдүүлж, өөрсдийгөө ороосоор.