Шадар сайд, Уул уурхайн сайд, Нийслэлийн Засаг даргын хамтарсан тушаалаар Налайхын нүүрсний орд газарт шалгалт хийх ажлын хэсэг байгуулагдан ажилласан. Дээрх ажлын хэсэг Налайхын нүүрсний орд газарт 14 аж ахуйн нэгж, хууль бусаар олборлолт явуулж байгаа 186 амны үйл ажиллагааг холбогдох хуульд заасны дагуу МХЕГ-ын Улсын байцаагчийн актаар зогсоожээ.Энэ байдлыг нүүрс олборлогч иргэд, аж ахуйн нэгжүүд эсэргүүцэн байцаагчийн тавьсан лацыг хөндөж эвдэх, лацадсан лебёдка троссны хажуугаар өөр техник хэрэгсэл ашиглах зэргээр нүүрс олборлосон 20 гаруй зөрчил илэрч, нэг хүний амь эрсэдсэн байна.
Уурхайн хаагдсан ам, малталт руу дураараа орох, амь эрсдэх магадлал өндөр байгаа тул ажлын хэсэг Засгийн газрын хуралдаанд Налайх дүүргийн ард иргэд болон төрийн байгууллагыг нүүрсээр хангах асуудлыг шийдвэрлүүлэх, нүүрсний ордыг цагдаа, дотоодын цэргийн түр хамгаалалтанд авахыг санал болгожээ. Түүнчлэн ажилгүй иргэдийг түр ажлын байраар хангах, хогийн цэгийг цэгцлэх, уурхайн ам, малталтуудыг хааж, зарим боломжтой ордуудын аюулгүй байдлыг хангах, эвдэрсэн газрын хохирлыг тооцуулах ажлыг хийлгэх тогтоолын төсөл боловсруулсан байна.
