
Хуулийн төсөлд орон нутгийн оролцоог нэмэгдүүлэх, өртөг нөхөх зардлыг хянах тогтолцоог хараат бус хөндлөнгийн байгууллагаар хийлгэх, үндэсний аж ахуйн нэгжүүдийг дэмжих, төрийн байгууллагуудын эрх үүргийг тодорхой болгох асуудлыг тусгажээ. Мөн бүх бүтээгдэхүүн хуваах гэрээнүүдийг байгалийн нөхөн сэргээгдэшгүй баялаг ашигласны төлбөр роялтитой болгох, роялтийн хувь хэмжээнээс орон нутагт тодорхой хэмжээг хуваарилах зэргийг тусгасан байна.
Өнөөдрийн байдлаар 21 талбайд 16 аж ахуйн нэгжтэй “Бүтээгдэхүүн хуваах” гэрээ байгуулан, Засгийн газраар батлуулан ажиллаж буй аж. Найман талбайд сонгон шалгаруулалт явуулсан бөгөөд нэг талбайд нээлттэй тендер зарласан хэмээн салбарынхан ярьж байна. Үүнээс “Тосон-Уул XIX”, “Тамсаг-XXI” талбайд “Петрочайна Дачин Тамсаг” ХХК, “БХГ-97” талбайд “Доншен Газрын тос (Монгол)” ХХК тус тус газрын тосны ашиглалт, олборлолтын үйл ажиллагааг явуулж байгаа аж. Бусад 18 талбайд хайгуулын ажил хийгдэж байна.