"Чингис хаан" нэр, "Чингис хааны албан ёсны хөрөг"-ийг хэрэглэх, ашиглах журмын тухай хуулийн төслийг УИХ-ын гишүүн Д.Ганбат, Г.Баярсайхан нар УИХ-ын дэд дарга Л.Цогд өргөн барьсан.

Дээрх гишүүд хэлэхдээ " "Чингис хаан" нэр, "Чингис хаан хөрөг"-ийг хэрэглэх, ашиглах боломж нээлттэй байгаа бөгөөд уг нэр, хөрөг бэлгэдлийг ашигласан бараа, бүтээгдэхүүний сав, баглаа, боодол өнөөдөр гудамжинд, хог дээр хэвтэж байгаа нь бид үндэстнийхээ бахархлыг үл хүндэтгэсэн явдал болж байгаагаас гадна "Чингис хаан" гэх энэ түүхэн хүний нэр хүндийг ч гутаан доромжилж байна" гэж хэлсэн юм.  Тиймээсн "Чингис хаан" нэр, "Чингис хааны хөрөг"-ийг хэрэглэх, ашиглахад хүндэтгэлтэй хандах, хэрэглэх, ашиглах хүрээ хязгаарыг тогтоох, жинхэнэ утгаар нь Монгол үндэстний бахархал байлгах эрх зүйн зохицуулалтыг бий болгох зорилгоор "Чингис хаан" нэр, "Чингис хааны албан ёсны хөрөг"-ийг хэрэглэх, ашиглах журмын тухай хуулийн төсөл санаачилсан гэдгээ Д.Ганбат, Г.Баярсайхан нар хэллээ.

   Хуулийн төсөл нь гурван бүлэг, 12 зүйлтэй аж. Төсөлд "Чингис хаан" нэр, "Чингис хааны албан ёсны хөрөг"-ийг хэрэглэх, ашиглах журам, хүрээ хязгаар, уг нэр, хөргийг хэрэглэж, ашиглаж болохгүй нөхцөл зэргийг нарийвчлан зохицуулахаар тусгажээ.