“Эрдэнэт үйлдвэр” ХХК нь сүүлийн жилүүдэд тоног, төхөөрөмжөө шинэчилж үйлдвэрлэлийнхээ насыг уртасгаж байна. Үүний нэг нь Баяжуулах фабрикт хийсэн технологийн шинэчлэлт юм. Нунтаглан баяжуулах хэсгийн хам флотацийн 6 дугаар ээлжийн ОК-50, ОК-38 маркийн флотомашинуудыг ОХУ-ын Санкт-Петербург хотын ИВС фирмийн зураг төсөл, РИФ-75 маркийн флотомашинаар солих өргөтгөлийн ажил ийнхүү амжилттай болжээ.

    Зургадугаар ээлжийн машинуудыг шинэчлэхэд Засвар угсралтын цех, Засвар механикийн завод, Барилга засварын цех, Их барилгын хэлтэс, Зураг төслийн товчоо, Холбоо мэдээллийн технологи ба автоматжуулалтын цех ажилласан бөгөөд “Бүтээл”, “Баяжуулагч одод”, “Эрдэнэт тисса” компаниуд хамтран ажиллажээ. Дашрамд дурдахад, “Эрдэнэт үйлдвэр” ХХК-ийн Баяжуулах фабрикийн хөвүүлэн баяжуулалтын 6 дугаар ээлжийн засварыг 2001 оноос хийж эхэлсэн байна. 2001 онд нэг, 2007 онд хоёр,  2008-2009 онд  гурав, 2011-2013 онд 4, 5, 6 дугаар ээлжийн машинуудыг шинэчилсэн байна.