Өнөөдөр өглөө 9.00 цагт Нийгмийн бодлого, боловсрол, соёл шинжлэх ухааны байнгын хороо хуралдах байсан. Мөн 10.00 цагт Эдийн засгийн байнгын хороо хуралдах байсан ч  Ардчилсан намын бүлгийн хуралдаантай давхацсан учраас хойшлогдлоо. .

 УИХ дахь Ардчилсан намын бүлгийн гишүүн бүр гурван байнгын хороонд харьяалагддаг бол УИХ дахь МАН-ын бүлгийн гишүүд нэг л байнгын хороонд харьяалагддаг юм. АН-ын бүлгийн хуралдаан дуусаагүй учраас 11.30 цагаас хуралдах байсан Төсвийн байнгын хорооны хурал ч хойшлогдож байна.

Хэдийгээр УИХ дахь “Шударга ёс” эвслийн бүлгийн гишүүд мөн гурав хүртэл байнгын хороонд харьяалагддаг ч байнгын хорооны хуралдаан зарлаад хуульд заасан хэмжээнд гишүүдийн ирц хүрэхгүй. Тиймээс УИХ дахь Ардчилсан намын бүлгийн хуралдаан өндөрлөсөн цагт байнгын хороо хуралдахаас аргагүй юм.  Дээрх байнгын хороодын хуралдаанаар “Дахин санал хураалтын зардал, “Монгол Улсын Ерөнхийлөгчийн сонгуулийн зардлын хэмжээг батлах тухай”, Стратегийн ач холбогдол бүхий салбарт үйл ажиллагаа явуулж байгаа аж ахуйн нэгжид гадаадын хөрөнгө оруулалтыг зохицуулах,  Үнэт цаасны зах зээлийн тухай, Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай, Хувь хүний орлогын албан татварын тухай хуульд өөрчлөлт оруулах тухай, Хөдөө аж ахуйн гаралтай бараа, түүхий эдийн биржийн тухай хуульд өөрчлөлт оруулах тухай, Зар сурталчилгааны тухай хуульд нэмэлт, өөрчлөлт оруулах тухай, Даатгалын тухай хуульд өөрчлөлт оруулах тухай, Санхүүгийн зохицуулах хорооны эрх зүйн байдлын тухай хуульд өөрчлөлт оруулах тухай, Аж ахуйн үйл ажиллагааны тусгай зөвшөөрлийн тухай хуульд өөрчлөлт оруулах тухай, Эрүүгийн хуульд нэмэлт, өөрчлөлт оруулах тухай, Хууль хүчингүй болсонд тооцох тухай хуулийн төслүүдийг тус тус хэлэлцэх байсан юм.