"Google" корпораци сүүлийн үед хэд хэдэн асуудалд орсон. Тэднийг Францын засгийн газар “Google Streetview” бүтээгдэхүүн нь хувийн нууцад халдсан гэх хэргээр шүүхэд өгсөн, АНУ-ын Дээд шүүх “Google Books” буюу номын сайтыг зохиогчийн эрхэд халдсан хэмээн үйл ажиллагааг хориглох хүртэл шийдвэр гаргасан гэх мэтчилэн тоочвол гарын хуруунаас хол давна. Гэвч мөнгийг цагаар бус секундээр олдог тус корпорацийн хувьд энэ бүхэн тийм ч сүйдтэй хүндрэл биш ажээ. Хэдий их мөнгөтэй ч гэсэн мөнгөөр шийддэггүй зүйлс бизнесийн ертөнцөд өч төчнөөн. Тэр бүхнийг зохицуулж, өөртөө ашигтайгаар бүр байя гэхэд хохирол багатайгаар шийдэж чадна гэдэг бизнесмэн хүний онцлог.

"Google"-ийн СЕО хэмээх эрхэм хүндтэй албан тушаалы эзэн байсан Эрик Шмит гэгч эр. Тэрбээр "Apple" корпорацийн захирлуудын зөвлөлийн гишүүн асан. Карнеги Мелоны их сургууль, Принцтоны их сургуулийн зөвлөлийн хүндэт гишүүнээр ажилладаг. "Google" корпорацийн захирлуудын зөвлөлийн даргаар 2001 оноос ажиллаж байгаад саяхан албан тушаалаа өгсөн.

Түүнтэй "Google" корпорацийн өнөөгийн төлөв, ирээдүйн стратегийн талаар "Сnет"-ийнхэн ярилцсаныг сонирхуулъя.

-Энгийн асуулт. Таны бодлоор "Google" гэж юу вэ?

-Маш олон хүн "Google"-ийг зүгээр л нэг хайлтын систем, эсвэл интернэт зар сурталчилгааны компани гэж ойлгодог. Манай компанийн зорилт “Дэлхий нийтийн мэдээ мэдээллийг эмхэтгэж, хэн ч, хаанаас ч, яаж ч олж болох боломжийг бүрдүүлэх” гэж тодорхойлсон байдаг. Миний бодлоор "Google" бол хайлтын систем, интернэт зар сурталчилгааны компаниас гадна хамтран ажиллагсдын сүлжээ, интернэт хэрэглэгч болон бизнес эрхлэгчдийн интернэт орчны дэд бүтцийг хөгжүүлэгч гэж ойлгодог. Бид өдөр бүр хэдэн хүнд хэчнээн долларын ашиг олж өгч буйг би сайн мэдэхгүй. Гэхдээ чамлахааргүй өндөр үзүүлэлт гарна гэдгийг та бүхэн надаар хэлүүлэлтгүй мэдэж байгаа. Манайх 2010 оны байдлаар 24.5 мянган ажилтантай гэсэн тоо баримт байдаг ч би үүнд итгэдэггүй. "Google"-ийн ажилтнууд үүнээс ч олон бий. Магадгүй та ч байж болно шүү дээ.

-Ирэх арван жилд "Google"-ийн хайлтын системийг хэрхэн шинэчлэх шаардлагатай вэ?

-Юуны түрүүнд бичсэн үгээр бус утгаар нь хайх, дэс дарааллыг эрэмблэх шаардлагатай байна. Хайлтын үр дүн яг бичсэн үгийг үзүүлэхээсээ илүүтэй өгөгдлийн утгатай вэб сайтыг харуулах зэрэг давхар функцтэй болгохоор ажиллаж байгаа. Үнэндээ мэдээллийн технологи маш хурдацтай хөгжиж байгаа учир ирэх арван жилд ийм, тийм болно гэдгийг таахад хэцүү. Жишээ нь "Google"-ийг үүсгэн байгуулагчдын нэг Сергей Бриний зохион бүтээсэн төхөөрөмж байна. Энэ нь хүний тархийг компьютерт холбож, тархинаас ирж буй өгөгдлийг интернэт болон компьютерийн сангаас хайлт хийх боломж олгох юм. Одоогоор энэ төхөөрөмж нь туршилтын шатандаа явж байгаа. Арван жилийн дараа гэхэд хэрэглээнд нэвтрээд эхэлчихсэн байх болов уу.

-Дэлхийн зах зээлийг интернэт илүү ардчилсан болгож буй гэдэгтэй санал нийлдэг үү?

-Мэдээж. Интернэт бол хил хязгааргүй зах зээл. Ширхэг бүтээгдэхүүнээс эхлээд олон зуун сая тонноор нь ч захиалж, борлуулж болдог. Интернэтэд хүн бүр тэгш эрхтэй. Гэвч үүний цаана хууль бус үйл ажиллагаа байхгүй гэх баталгаа үгүй. Энэ бүхнийг харж, хянана гэдэг нүсэр хүн хүч, зардал чирэгдэл шаардагддаг. Интернэт эхлээд дэлхийн зах зээлд мэдээ мэдээлэл түгээх хэрэгсэл нь байсан бол одоо бизнесийн орчин нь болсон байна шүү дээ. Удахгүй бүх зүйл тэнд байх болно гэдэгт би итгэдэг.

-Тэгэхээр таны бодлоор интернэтэд хараахан бүх зүйл орчихоогүй гэсэн үг үү?

-Бараг л бүх зүйл гэж хэлмээр байна. Манай захирлуудын зөвлөл хуралдахад хэд хэдэн оновчтой санаа гарч ирсэн. Бид үүнийг бодит ажил болгож, хэрэглэгчдэд удахгүй танилцуулах болно. Тэгэхээр та ойлгох байх. Ер нь хүний хэрэглээ хязгааргүй шүү дээ. Үүн шиг интернэт хэрэглээнд ч хязгаар гэж үгүй.

-Таны бодлоор интернэт орчинд ямар хүн илүү амжилт олох бол?

-Ихэнх хүн өглөө есөн цагт ажилдаа ирж, тав эсвэл зургаан цагт ажлаасаа буудаг. Тэдний бүтээмж ажлын найман цагт юуг хийж, амжуулж чадсанаар хязгаарлагддаг шүү дээ. Энэ бол олон арван жил ажиглагдаж буй баримт. Таны эцэг эх, эмээ өвөө ч ийм маягаар ажилласаар ирсэн. Бид XXI зууны хүмүүс гэж өөрсдийгөө нэрлэх дуртай. Гэтэл бидний хэд нь цаг хугацаа орон зайд баригдахгүй ажиллаж чадаж байна вэ. Хариулт нь цөөн гэдэг тодорхой. Бидэнд орон зайд хязгаарлагдахгүй ажиллах орчин нь байсаар байтал яагаад бид хуучны маягаасаа татгалзаж чадахгүй өнгөрсөн цагтайгаа зууралдах ёстой юм бэ. Энэ бүхнийг өөрчлөх гэсэн хүмүүс бий. Эхнээсээ эхлээд энэ бүхнийг хэрэгжүүлж байна. Тэгэхээр ийм орчинд цаг нарыг умартаж, төлөвлөгөө зөв боловсруулж чадах аливаа хүн амжилт гаргахад болохгүй гэх шалтгаан байхгүй.