Хятадуудаас авлига авсан гэх цагдаа У.Раднаабазар, Б.Батбаяр, Д.Энхбаатар, Г.Ууганбаяр, Б.Төгсбаярын хэргийг өнөөдөр Нийслэлийн шүүхэд хэлэлцлээ.
Тэдний хэргийг өнгөрсөн хоёрдугаар сарын 22-ны өдөр Баянгол дүүргийн шүүхээс нэмэлт мөрдөн байцаалтад буцаасан ч хяналтын прокурор М.Сүхчулуун эсэргүүцэл бичсэн юм. Харин уг эсэргүүцлийг өнөөдөр Нийслэлийн шүүхээс үндэслэлгүй хэмээн үзлээ. Ингэснээр авлига авсан гэх цагдаа нарын хэргийг УМБГ-т буцааж, дахин шалгахаар боллоо.
Хуралд өмгөөлөгчөөр Б.Лхагвацэрэн, Э.Туул, П.Төрбат, Ч.Болдбаатар, Г.Гэрэлт-Од, Г.Хандсүрэн, улсын яллагчаар М.Сүхчулуун, илтгэгч шүүгчээр Ш.Бат-Эрдэнэ нар оролцов.
  Хэргийг сануулбал, Улсын Ерөнхий прокурорын дэргэдэх Мөрдөн байцаах албанаас өнгөрсөн оны хоёрдугаар сарын 10-наас эхлэн Нийслэлийн хэв журмыг хамгаалах газар, Хөдөлгөөнт эргүүлийн Н.Раднаабазар нарын дөрвөн албан хаагчийг авлигын хэрэгт холбогдуулан шалгаж, цагдан хориод байсан билээ.
Тэд албан тушаалаа урвуулан ашиглаж, бусдаас онц их хэмжээний хахууль авсан байдаг. Тухайн үед самар хууль бусаар ачиж яваа хятадуудын талаархи мэдээллийг иргэд өгсөн ч цагдаа нар газар дээр нь очоод самрын хууль бус наймаа эрхэлдэг хятадуудтай хуйвалдсан аж. Тодруулбал, хятадууд хэргийг нуух зорилгоор 40 сая төгрөгийг цагдаа нарт өгч самрыг ачуулж, хилээр гаргасан байдаг.