УИХ-ын Төрийн байгуулалтын байнгын хороо өнөөдөр үдээс өмнө хуралдаж дөрвөн асуудал хэлэлцэхээр төлөвлөсөн байсан ч байнгын хорооноос ажлын хэсэг гаргаж Төрийн албаны зөвлөлд зарим хуулийн хэрэгжилттэй танилцахаар болж байгаа тул төсөл санаачлагч гишүүн Су.Батболд Төрийн албаны тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хойшлуулах санал гаргасныг байнгын хорооны гишүүд дэмжлээ.Иймээс байнгын хорооны хурлаар эхлээд “Монгол Улсын хууль тогтоомжийг 2016 он хүртэл боловсронгуй болгох үндсэн чиглэлийг батлах тухай” УИХ-ын тогтоолын төслийн анхны хэлэлцүүлгийг хийж, байнгын хорооны гишүүдээс гаргасан зарчмын зөрүүтэй саналын томъёоллоор санал хураалт явуулав. Гишүүн Г.Батхүү Төрийн аудитын тухай хуульд өөрчлөлт оруулах төсөл санаачилж Засгийн газрын санал авахаар хүргүүлээд байгаа тул үндсэн чиглэлийн төсөлд нэмж тусгах санал гаргасныг гишүүд дэмжлээ. Мөн түүний гаргасан Төрийн хэлний тухай хуульд нэмэлт, өөрчлөлт оруулах саналын тухайд гишүүн М.Батчимэг зөвхөн нэмэлт, өөрчлөлт оруулах биш шинэчлэн найруулах нь зүйтэй гэсэн байр суурийг гишүүн Су.Батболд бас дэмжиж буйгаа хэллээ. Ингээд энэ асуудлыг нэмж тусгахаар болов.
Гишүүн А.Бакей, С.Дэмбэрэл, Ж.Батзандан нар УИХ, Засгийн газрын бүтэц, менежментийг сайжруулах тухай тогтоолын төсөл боловсруулж батлуулах асуудлыг нэмж тусгах санал гаргасныг мөн дэмжлээ. Энэ тухайд гишүүн С.Дэмбэрэл төрийн институц, тэдгээрийн харьяа байгууллагуудын бүтэц аль болох тогтвортой, засаг солигдохоос хамаарал багатай байх нь зохистой. Төрийн болон төлөөллийн байгууллагууд, түүнчлэн шууд оролцоо, иргэний нийгмийн байгууллагуудын уялдаа холбоог сайжруулах явдал чухал байна гэдгийг хэлсэн бол гишүүн Су.Батболд улс төрийн аль нэг нам олонх болсноос хамаарахгүйгээр яамдыг хуульчилж, Ерөнхий сайд нь үндсэн гол бодлогынхоо чиглэлээр хоёроос илүүгүй яамыг өөрчилж болдог, харин бусад нь тогтвортой байдаг зарчмыг хэрэгжүүлэх нь чухал юм гэлээ.
Мөн гишүүн Ж.Батзандан захиргааны шинэтгэлийг цогцоор нь харах цаг болсон, Засгийн газар асуудлыг оруулж ирэхгүй бол УИХ хүлээж суух биш хууль батлах замаар асуудлыг хөндөж тавихаас аргагүй гэдгийг хэлсэн юм. Мөн гишүүн Су.Батболд Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах, гишүүн А.Бакей, С.Дэмбэрэл нар Улс төрийн намын санхүүжилтийн тухай, гишүүн Р.Бурмаа сонгуулийн нэгдсэн хууль, гишүүн М.Батчимэг Хэвлэл мэдээллийн эрх чөлөөний тухай, Хэвлэл мэдээллийн хэрэгслийн тухай, Өргөн нэвтрүүлгийн тухай, Өгөгдлийн /контентын/ тухай хуулийг үндсэн чиглэлийн төсөлд нэмж тусгах санал гаргасныг дэмжлээ.
Харин гишүүн Ж.Батзандан Үндсэн хуульд өөрчлөлт оруулах тухай хуулийн төслийг нэмж тусгах санал гаргахад гишүүн М.Батчимэг энэ нь үндэсний зөвшилцлөөр шийдэгдэх асуудал учраас төлөвлөгөө болгож тусгах хэрэггүй юм гэсэн саналтай байв. Ингээд санал хураалгахад байнгын хорооны гишүүдийн олонх нь Үндсэн хуульд өөрчлөлт оруулах асуудлыг үндсэн чиглэлд нэмж тусгахыг дэмжлээ.
Ингээд байнгын хорооноос гаргасан санал, дүгнэлтийг Хууль зүйн байнгын хороонд хүргүүлэхээрр болов.
Дараа нь “Байгууллагын үйл ажиллагаанд системчилсэн үнэлгээ хийх тухай” байнгын хорооны тогтоолын төслийг хэлэлцлээ. Хууль зүйн яамнаас “Байгууллагын үйл ажиллагаанд системчилсэн үнэлгээ хийх аргачлал”-ыг хяналт шинжилгээ, үнэлгээ хийх үйл ажиллагааг боловсронгуй болгох, хүний нөөцийг чадваржуулах зорилгоор боловсруулан мөрдөж байгаа аж. Төсөл санаачлагч гишүүн С.Дэмбэрэл танилцуулгадаа, байгууллагын үйл ажиллагаанд үнэлгээ хийхдээ шууд удирдлагын үүрэг болгосноор буюу иргэдийн гомдол, мэдээллийн мөрөөр тодорхой асуудлыг сонгон авч үнэлэх, эсвэл байгууллага өөрөө нэг иж бүрэн тогтолцоо болохын хувьд хэрхэн ажиллаж байгаа талаар системчилсэн үнэлгээг байнгын давтамжтайгаар бүхэлд нь ч хийж болно. Үнэлгээний зорилго нь тухайн байгууллагын үйл ажиллагааны буюу чиг үүргээ хэрэгжүүлж байгаа байдлын үр өгөөж, өөрийн тавьсан зорилгодоо хүрч чадсан эсэх, бүрэн хүрч чадаагүй зорилго байгаа бол түүний шалтгаан, нөхцөлийг тодорхойлох юм. Байгууллагын системчилсэн үнэлгээ нь байгууллагын чиг үүргийн үнэлгээ; байгууллагын үйл ажиллагааны журмын (процессын) үнэлгээ; хүний нөөцийн хэрэгцээний үнэлгээ; санхүүгийн буюу захиргааны зардлын үнэлгээ гэсэн үндсэн дөрвөн төрөлтэй байна гэдгийг дурдлаа.
Байгууллагын үйл ажиллагаанд системчилсэн үнэлгээ хийх аргачлалыг УИХ-д ажлаа шууд хариуцан тайлагнадаг байгууллагуудад хэрэглэснээр байгууллагын үйл ажиллагааг сайжруулах, бодлого боловсруулах, шийдвэр гаргахад чухал аргачлал болно гэж төсөл санаачлагч болон байнгын хороо үзэж байгаа аж. Иймээс УИХ-д ажлаа шууд хариуцан тайлагнадаг байгууллагын удирдлагууд жилийн ажлын тайлангаа УИХ-д ирүүлэхдээ өөрсдийн үйл ажиллагаанд Хууль зүйн яамнаас боловсруулсан “Байгууллагын үйл ажиллагаанд системчилсэн үнэлгээ хийх аргачлал”-ын дагуу үнэлгээ хийж ирүүлж байх, мөн тухайн байгууллагууд жилийн ажлын тайландаа системчилсэн үнэлгээ хийж ирүүлсэн эсэхэд хяналт тавьж, дүгнэлт гаргаж байнгын хороонд танилцуулж байхыг УИХ-ын Тамгын газарт үүрэг болгохоор тогтоолын төсөлд тусгасныг гишүүд дэмжлээ.
Байнгын хорооны хуралдаанаар дараа нь “Төрийн албаны зөвлөл дээр зарим хуулийн хэрэгжилттэй танилцах ажлын хэсэг байгуулах тухай” байнгын хорооны тогтоолын төслийг хэлэлцэж, ажлын хэсгийг гишүүн Су.Батболдоор ахлуулан гишүүн Ж.Батзандан, Г.Батхүү, Н.Батцэрэг, Р.Бурмаа, С.Дэмбэрэл нарын бүрэлдэхүүнтэй байгуулахаар тогтов. УИХ дахь МАН-ын бүлгээс Ерөнхий сайдыг огцруулах талаар гаргасан саналыг хэлэлцэх үеэр Төрийн албаны зөвлөлийн үйл ажиллагаатай холбогдсон асуудлууд хөндөгдөж байсан. Иймээс тус намын бүлгээс УИХ-ын даргад өгсөн албан бичгийн дагуу байнгын хорооноос ажлын хэсэг гаргаж зарим хуулийн хэрэгжилттэй танилцах нь зүйтэй гэж үзсэн байна. Ажлын хэсгийн гаргасан санал дүгнэлт, шийдвэрийн төслийг энэ тавдугаар сард багтаан байнгын хорооны хуралдаанаар хэлэлцэхээр болов гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.
