УИХ-ын гишүүн Ё.Отгонбаяр гишүүний эхнэрийг саатуулсантай холбоотой Нийслэлийн прокурорын газраас дөнгөж сая мэдээлэл хийлээ.  Ё.Отгонбаяр сайдын эхнэрийг их хэмжээний мөнгө гуйвуулсан, татварын төлөөгүй зэрэг үндэслэлээр байцааж байгаа бөгөөд эл хэргийн мөнгөн дүн дээр багагүй маргаан гараад байгаа юм. Тэгвэл энэ талаар Ц.Батболд прокурор тайлбарлахдаа, “Очирбатын Эрдэнэсолонгын дөрвөн банкин дахь 21 дансаар нэлээдгүй их хэмжээний мөнгөн гүйлгээ хийгдсэн. Энэ их мөнгө ямар эх үүсвэрээс орж ирсэн, эл мөнгөний эх үүсвэр хууль ёсных юм уу, хууль бус юм уу гэдгийг хууль зүйн дагуу шалгалтын ажиллагааг эхэлсэн. Энэ хүнийг энэ сарын 5-наас сэжигтнээр цагдан хорьсон. Мөнгөн дүнгийн талаар хэвлэл мэдээллээр тоо баримт дэлгэн яригдаж байна. Хуулийн байгууллагын зүгээс энэ хэрэг дээр мөнгөн дүнгийн талаар ямар нэг мэдээлэл хийгээгүй. ЦЕГ-аас гарсан мэдээлэл дээр ч мөнгөн дүнгийн талаар хэлээгүй" хэмээн үгүйсгэв. Ийн ЦЕГ-аас мөнгөн дүнгийн талаар юу ч хэлээгүй, зөвхөн шалгавал зохих шаардлагатай мөнгө гэж хэлсэн нь сэтгүүлчдийн гайхшралыг төрүүлэв.

Тэрээр мөн  “Ё.Отгонбаяр гишүүн эхнэр О.Эрдэнэсолонготойгоо уулзах хүсэлтийг албан ёсоор ирүүлээгүй байгаа” гэх мэдээллийг энэ үеэр хэллээ. 

Өмнө нь Цагдаагийн газрын олон нийттэй харилцах хэлтсийн дарга, хурандаа Т.Сайнжаргал хэлэхдээ “О.Эрдэнэсолонгын   Зоос банк, Голомт банк, Худалдаа хөгжлийн банкин дахь дансаар 2009-2013 оны хооронд нийтдээ 323 сая ам.доллар, 13.9 тэрбум төгрөг, байршуулан угаасан байж болзошгүй” гэсэн билээ.