24tsag.mn facelook булангийнхаа энэ удаагийн дугаарт сонгодог урлагт тод мөр үлдээж яваа нэгэн хөгжимчнийг гэрэл зургуудынх нь хамт урилаа. Энэ бол Монголын урлагт нэртэй, мөртэй яваа СТА хийлч Ч.Дэлгэрцэцэг юм. Түүний амьдралыг товч өгүүлэх гэрэл зургуудтай нь танилцана уу.

Сахилгагүй Дээгий: Ч.Дээгий эцэг эхээс дөрвүүлээ бөгөөд айлын ганц охин. Түүнийг хичээлдээ бараг суудаггүй хүүхэд байсан гэж нэгэн хэвлэлд бичжээ. Хичээл таслахаас гадна хөдөлгөөнтэй, сахилгагүй, хэрэг төвөг тарьдагаараа алдартай байсан түүнийг бага сургуулийнх нь найзууд хүүхэд байхаасаа тэс өөр болж, төлөв түвшин болж хүмүүжсэнд гайхдаг гэсэн шүү. Дээгийгийн ард "Камертон" хамтлагийн Н.Болд, Мээдээ нар зогсжээ. Тэд хөгжим бүжгийн коллежийн нэг ангийнхан.



Бас л: Өмнөх зургаас цөөхөн хэдэн жилийн дараа. Бас л Дээгий, Болд, Мээдээ. 1980-аад оны хүүхдүүд.



Төгсөлт: Долоон настайдаа хөгжим бүжгийн сургуулийн хийл хөгжмийн ангид орсон Дээгий 12 жил суралцаж коллежоо төгссөн нь энэ. СУИС-д ангиараа орсон ч Дээгий ганцаараа өөр шийдвэр гаргаж ШУТИС-ийн Англи хэлний сургуулийн инженер, орчуулагчийн ангид элссэн гэдэг. Түүний энэ шийдвэр нь хожим гадаадад суралцахын эхлэл нь болж өгсөн ч юм билүү.

Олны танил болсон нь: “Хэнтийн өндөр ууланд” аялгууг тоглож олонд танигдсан Дээгийг хүмүүс тухайн үедээ маш сайхнаар хүлээж авсан. Угийн авъяас юм болохоор тэрээр "star" болтлоо олонд танигдаж чадсан юм. Гэхдээ тэр нэх удалгүй АНУ-ын Мичиган мужийн “Grand Valley” их сургуулийн хийлийн гоцлон тоглоочийн ангид суралцахаар явлаа.



Содон имиж: “Үлэмжийн чанар” дууг халзан толгой, хагас нүцгэн байдалтайгаар тоглосон нь олны амыг ангайлгаж орхисон юм. Одоо харин түүний үс урт хүрэн, бор болсон.



Хүү: Дээгий Америкаас ирэхдээ нөхөр, хүүхэдтэй болоод эргээд ирсэн. Ананд хүүгийнх нь аав Саха Миянатан хэмээх Дэлхийн банкинд ажилладаг нас тогтсон эрхэм байлаа. Тэр бусад эмэгтэйчүүд шиг биеийн галбиртаа тэр бүр санаа зовоод байдаггүй. Хүүгээ хөхнөөс гартал хоолны дэглэм барилгүй дураараа идэж байсан гэдэг.



Мэс засал: Зарим нэгэн шиг гоо сайхны хагалгаанд орсноо тэр нууж үгүйсгэдэггүй. Үүнээс хойш тэрээр фото зургууд дээр арай өөрөөр гарах болно. Хүүгээ төрүүлснийхээ дараахан хамраа өндөрлүүлж гадаад төрхөндөө эрс өөрчлөлт хийсэн нь энэ юм. “Байгалиас заяасан гоо үзэсгэлэнгээ тордох нь эмэгтэйчүүд бидний үүрэгт ажил. Бүр нэн тэргүүний үүрэг” гэж тэр тухайн үед хэлж байв.

Шинэ шинэ: Шинэ хамар, шинэ давхраа, шинэ дүр төрх.

Туршлагатай хийлч: Тэр “Degi concert”, “Гайхмаараа”, Чайковскийн үдэш” зэрэг олон тоглолт хийж байсан туршлагатай хийлч.  Өнгөрсөн долдугаар сард өөрийн багш, дэлхийн шилдэг хийлчдийн нэг Дилана Женсонтой хамтран тоглолт хийсэн үзэгчдийн оюуны цангааг тайлав. Мөн Тэрээр АПУ болон “Эйр линк” компаний нүүр царай болсон гэх мэтээр шоу бизнесийн ертөнцөд тун ч амжилттай карьер хөөж явна.



Аз жаргалтай эмэгтэй: Тэр цайг чанахдаа 108 удаа самрах дуртай. Гэхдээ тэр гал тогоонд бус тайзан дээр хамгийн жаргалтай эмэгтэй гэдгээ мэдэрдэг.



Хурим: Дээгий хүүгийнхээ ааваас салсныхаа дараа удалгүй дахин хуримлалаа. Шинэ нөхөр Марк Бейли нь 30 гаруй жил уул уурхайн салбарт ажиллаж байгаа бөгөөд “Лейтон Ази” компанийн уул уурхайн бизнесийг босгоход чухал үүрэг гүйцэтгэсэн арвин туршлагатай бизнесмэнээс гадна хүмүүнлэг үйлс, олон нийтийн төлөө далайцтай үйл ажиллагаа явуулдаг нэгэн гэж хэвлэлээр бичжээ.



“Би бүгдийг зохицуулна”: Эмэгтэй хүн бүрийн дурлаж сонирхдог цэцэг жимсэнд тун дургүй Дээгийд “Би бүгдийг зохицуулна” гэдэг эрчүүд л таалагддаг гэнэ лээ. Тэр таалагддаг эр хүнтэйгээ гэрлэсэн болов уу.



Өөрийнх нь хэлсэн үг: "Би бүсгүй хүний дэлгэрэх нас буюу гуч гарсан насан дээрээ зогсож байна. Хорин нас айж эмээх, сурч боловсрох, сонсож дуулах нэг ёсны авах нас байдаг бол гучаад нас өөрийгөө таньж мэдсэн, өөртөө эзэн байж, юу хэлэхээ, юу хүсч байгаагаа мэдэрдэг нас юм байна. Би яг л тийм насан дээрээ явна. Би дэлгэрч байна".

24tsag.mn Т.Хулан