Улсын мөрдөн байцаах газраас дөнгөж сая Ё.Отгонбаяр гишүүн болон түүний эхнэртэй холбогдох хэргийн талаар дэлгэрэнгүй тайлбарыг өглөө. Мөн Н.Хүрэлбаатар, Б.Цогтбаатарын нарын хэргийг ч цухас дурдсан юм. Ингээд УМБГ-ын дарга, хурандаа Ц.Батсүхээс дараах зүйлсийг тодруулав.

-Ё.Отгонбаяр гишүүний эхнэрийн дансан дахь мөнгөний хэмжээн дээр ихээхэн маргаан дэгдэж байгаа. Дансан дахь мөнгөний хэмжээг ер нь тогтоосон уу?

-О.Эрдэнэсолонго нь  “Зоос”, “Анод” гэх мэт  дампуурсан банкинд данстай байж таарсан. Бид эдгээр дампуурсан банкны санхүүгийн баримтыг нягтлах хэрэгтэй байгаа. Банкнуудыг шалгах, дансан дахь мөнгийг нягтлах ажил Прокурорын хяналтанд явагдаж байна.
Эл хэргийг улс төрийн өнгө аястай болгож, сонгууль ойртож байхад ийм асуудал гаргаж байна гэх мэт зүйлийг ярих нь зохисгүй юм. Сонгууль боллоо гээд Мөрдөн байцаах ажиллагаа зогсох хууль байхгүй. Мөнгөний хэмжээ  их, бага ямар ч байж болно. Үүнийг бид мөрдөн байцаах хугацаандаа тогтоогоод,  нягтлах үүрэгтэй.  Одоогоор мөнгөн дүнг, санхүүгийн баримтыг нягтлаад шалгаж, эхнээсээ илэрч байгаа.

-Ё.Отгонбаяр гишүүн эхнэртэйгээ уулзах хүсэлтээ мөрдөн байцаах  газар өгсөн гэсэн. Энэ үнэн үү?

-Ар гэрийнхэн болон өмгөөлөгч нь О.Эрдэнэсолонгыг өвчний улмаас гадуур шалгаад өгөөч гэсэн санал ирүүлсэн. Бид хүсэлтийг хүлээн авч, О.Эрдэнэсолонгыг шалгах шалгалтын явц удаан явагдах учир таслан сэргийлэх арга хэмжээг өөрчлөх хүсэлтийг өнөөдөр прокурорт хүргүүлсэн. Мөн Ё.Отгонбаяртай холбоотой хууль зөрчсөн  баримтууд илэрсэн.

-Ямар?

Ё.Отгонбаярын хэргийн тухайд 2013 оны гуравдугаар сарын 20-нд иргэн Ч гэж хүн “Намайг Энхтайваны гүүрэн дээр хэсэг залуус зодож, миний “Ланд круйзер 200” маркийн автомашиныг дээрэмдчихлээ. Энэ хэрэгт УИХ-ын гишүүн Ё.Отгонбаярыг би сэжиглэж байна. Учир нь БСШУ-ын сайд байсан Ё.Отгонбаяр гэж хүн сайдаар ажиллаж байхдаа Налайх дүүрэгт барьсан миний нэр дээр байдаг барилгын ашиглалтын зөвшөөрлийг өгөхгүй байсан. Ё.Отгонбаяр барьсан барилгыг минь ашиглалтад хүлээж авахдаа 230 сая төгрөгийг хахуульд авах саналыг хүнээр дамжуулан  надад тавьсан. Энэ хахуулийн мөнгийг өгөхгүй гэсний хариуд хүмүүс явуулж, намайг зодуулж, дээрэмдүүллээ” гэж манайд хүсэлт гарган, мэдүүлсэн байдаг. Бид энэ дагуу шалгаж үзэхэд иргэн Ч-гийн өгсөн мэдээлэл үнэн байсан.

-Тэгэхээр ганц эхнэр нь мөнгөний хэрэгт холбогдсон биш Ё.Отгонбаяр гишүүн өөрөө ч  хээл хахуулийн мөнгө нэхэж, захиалгаар хүнийг зодож, дээрэмдүүлсэн хэрэгт шалгагдаж байгаа гэсэн үг үү?

-Зодсон, хээл хахууль өгөхийг санал болгож зуучилсан хүмүүс нь бүгд тэр талаар гэрчилж байгаа.  Ё.Отгонбаяр тэр хүнтэй хамт хоолонд орохдоо хахуулийн мөнгө нэхэж,  мөнгөний хэмжээний талаар тохиролцож байгаа баримт нь ч бий. Анх ийм учраас Ё.Отгонбаяр гишүүнийг шалгах шаардлагатай болсон. Өөрөөр хэлбэл албан тушаалтнууд хүнээс хахууль авдаг юм байна. Хахууль нэхдэг зэргийг бид шалгах үүрэгтэй. Тиймээс иймэрхүү хэргийн хүрээнд бид шалгаж байгаа. Түүнээс биш гэнэт хорьж цагдаад эхэлсэн юм байхгүй. Мөрдөн байцаах үйл ажиллагаа тасралтгүй явагдаж байна. Шалгах ажиллагаанд бид Монголбанкны Санхүүгийн мэдээллийн албанаас тодорхой мэдээлэл авч, мөрдөн байцаалтын явцад нотлох баримт цуглуулсан байгаа. Хэргийг шалгах явцад Ё.Отгонбаярын эхнэр О.Эрдэнэсолонгын дөрвөн банкин дахь 26 дансаар их хэмжээний гүйлгээ орж, гарсан нь тогтоогдсон.

- Тэгэхээр Ё.Отгонбаярт холбогдох хэргийг яг хэзээнээс шалгаж эхлэх вэ?

-Тэрээр УИХ-ын гишүүн учир халдашгүй бүрэн эрхтэй байдаг. Тиймээс бүрэн эрхийнх нь хүрээнд хуулийн дагуу асуудлыг тавина.

-Эрүүл мэндийн сайд асан Н.Хүрэлбаатар гишүүнийг онгоцноос буунгуут нь баривчласан.  Тэр үед Н.Хүрэлбаатар “энэ бол улс төрийн хэлмэгдүүлэлт” гэж байсан. Энэ талаар?

-Сонгууль дөхөөд ирэхээр бариад аваад явчихлаа гэж гадуур ярьж байна. Энэ хүн Эрүүл мэндийн яамны Төрийн нарийн бичгийн дарга Түмэндэмбэрэл нарын хэргийг шалгаж эхэлсэний маргааш нь гадаад явчихсан байгаа. Улмаар түүнийг эрэн сурвалжилж зарлаж, хүүхдийг нь хорьж байж авчирсан. Түүний гэрт сейфтэй 2 сая 145 мянган юан хадгалагдаж байсан. Үүнийг цагдаагийн байгууллага тухайн үед олж аваад хурааж байсан. Бид энэ юун мөнгө, ямар учиртай мөнгө вэ гэдийг асууж, шалгах үүрэгтэй. Гэтэл улс төржүүлээд байх юм.

-