МИАТ-ийн экс дарга нар болон тэдэнтэй хамтарч мөнгө угаасан хэргийн шүүх хурал өчигдөр дуусч долоон хүн арав ба түүнээс дээш жилийн ял авлаа. “Дайны эрсдлийн даатгалын төлбөр” нэрээр их хэмжээний мөнгийг гадаад дахь зохиомол компанийн данс руу шилжүүлж, мөнгө угаасан гэх энэ дуулиан хэрэгт холбогдсон эдгээр хүмүүсийн ихэнхи нь ийм хэмжээний ял авч байгаадаа, ял авч буй зүйл ангитай санал нийлэхгүй байгаа юм. Сүүлийн үед ар араасаа цувран илрэх болсон их хэмжээний мөнгө идсэн, шамшигдуулсан хэргийн эхлэл болсон энэ хэрэгт доорх хүмүүс ямар шалтгаанаар ял авсан, түүнийгээ хэрхэн мэдүүлсэн талаар хүргэе.
Дэд захирлаар ажиллаж байсан Ч.Хоролсүрэн- 13 жил нэг сар
Хэргийн эзэн, хэнгэргийн дохиур гэдэг шиг гол хэрэгтэн болсон Ч.Хоролсүрэнгийн хувьд Дайны эрсдлийн сангийн дансанд шилжсэн мөнгөнөөс хувь авдаг байсан бөгөөд үүнийгээ бусаддаа хэлдэггүй байжээ. Тэрбээр шүүх хурлын үеэр бусад хүмүүсийг энэ хэрэгт холбогдуулсандаа харамсч байгаагаа хэлжээ. “Миний хувьд гэм буруугаа хүлээж, хариуцлага хүлээхэд бэлэн байна. Улсад ямар нэгэн хохирол учруулсан бол төлнө” гэсэн юм. Гэхдээ Ч.Хоролсүрэн энэ хэргийг гардаж хийсэн гэдгээ хүлээн зөвшөөрөөгүй бөгөөд “Миний хувь нэг ч удаа гэрээ хийж байгаагүй. Мөнгө шилжүүлж байсан удаа байгаа бол Б.Бат-Эрдэнийн даалгавараар шилжүүлж байсан байх. “Best Wealth AlGroup” компаний захирал Тони Ли гээд 40 орчим насны эрэгтэйтэй нэг удаа уулзаж байсан. Миний хувьд гадаадад амьдардаг байсан учраас хүний дансан дээр мөнгө хүлээж авдаг байсан” гэж мэдүүлжээ.
МИАТ-ийн захирал асан Б.Эрдэнэбилэг- 14 жил нэг сар
Тэрбээр 2006 оны тавдугаар сараас 2009 оны гуравдугаар сар хүртэл “МИАТ” компанийн гүйцэтгэх захирлаар ажиллаж байсан. 2005-2007 оны хооронд Дайны эрсдэлийн сангийн дансанд таван удаа гүйлгээ хийсэн байдаг. Б.Бат-Эрдэнэ “Би мөнгө шамшигдуулаагүй. “Best Wealth AlGroup” удирдлагуудтай нэг ч удаа уулзаж байгаагүй. 2008 онд нэг удаа гэрээ явуулж байсан. Тухайн үед би гэрээг өмнө нь байгуулсан байсан учраас шалгаж үзэлгүй сунгаж үргэлжлүүлсэн. юм. Ч.Хоролсүрэнгээс авсан, өгсөн мөнгө байхгүй” гэж шүүх хурлын үеэр ярьжээ.
МИАТ-ын захирал асан Б.Бат-Эрдэнэ- 12 жил нэг сар
Түүний хувьд Дайны эрсдэлийн сангийн гэрээнд гарын үсэг зурсан. Тухайн үед НҮБ-ын конвенцод эрсдэлийн сан байгуулах ёстой гэж заасан учраас үргэлжлүүлэх ёстой гэж гарын үсэг зурсан гэж мэдүүлжээ. Тэрбээр сайн судлалгүй шууд гарын үсэг зурж, ажилдаа хайнга хандсан гэж мэдүүлжээ. Харин мөнгө угаасан гэх хэрэгт оролцоогүй бөгөөд ийм олон жилийн ял авсантай санал нийлэхгүй байгаагаа хэлсэн байна.
МИАТ-ын захирал асан Ц.Орхон- 11 жил
Ц.Орхоны хувьд МИАТ компанийн маркетингийн албаны даргаар ажиллаж байгаад 2010 онд гүйцэтгэх захирал болсон. Тэрбээр захирлын ажил эрхэлж байх хугацаандаа Дайны эрсдэлийн санд гурван удаа мөнгө шилжүүлсэн байдаг. Харин түүний эхнэр Ү.Цэцэгмаа 2002 онд Ч.Хоролсүрэнтэй хамт Хонконг явахдаа ХЗХ-ны үйл ажиллагаатай холбоотойгоор хамтын данс нээлгэсэн байна. Ү.Цэцэгмааг шалгаад мөнгө угаасан гэх хэрэгт холбоогүй гэж үзсэн билээ. Харин Ц.Орхонд 11 жил ял оноосон бөгөөд "Best Wealth AlGroup”-ийн удирдлагуудтай нэг ч удаа уулзаж байгаагүй гэдгээ шүүхийн танхимд хэлжээ.
“Голомт” банкны салбарын захирлаар ажиллаж байсан Г.Саранчимэг- 11 жил нэг сар
Энэ хэрэгт холбоотойгоор ял авсан хүмүүсээс хамгийн гомдолтой байгаа нь 1997-2007 онд “Голомт” банкны зургаадугаар салбарын захирлаар ажиллаж байсан Г.Саранчимэг. Тэрбээр Ч.Хоролсүрэнд нэг удаа хөдөө байдаг Туяа гэдэг найзынхаа нэр дээр данс нээж өгсөн байна. Нэг удаа данс нээж өгөөд 11 жилийн ял авсандаа тун их харамсч байгаагаа шүүгчдэд хэлсэн юм. Г.Саранчимэг “Би данс нээж өгсөндөө харамсч байна. Тэгээд ч би тэр явдлаас болж ажлаас халагдсан. Намайг бусадтай бүлэглэн мөнгө шамшигдуулсан гэдэгтэй санал нийлэхгүй. Энэ хүмүүсийг би одоо л харж байна. Хоригдож байх 83 хоногийн хугацаанд огт уулзаж байгаагүй” гэжээ.
Ч.Хоролсүрэнгийн дүү Ч.Суурьтогтох- 10 жил нэг сар
Харин Ч.Хоролсүрэнгийн дүү, "Монголиан эйрлайнс" группын захирал асан Ч.Суурьтогтох өөрийгөө гэм буруугүй гэж мэдүүлсээр байсан бөгөөд Ч.Хоролсүрэн ахынх нь компани өөрийнх нь нэр дээр байдгаас өөр оролцсон зүйлгүй гэж мэдүүлжээ.
Т.Гэрэл
Сэтгэгдэл (27)