УИХ-ын гишүүн Ё.Отгонбаярын эхнэр О.Эрдэнэсолонгыг их хэмжээний мөнгө угаасан хэрэгт холбогдуулан цагдан хорьсон билээ. Түүнийг хүн аминий хэрэг хийсэн хүнтэй хамт хорьж байна гэж Ё.Отгонбаяр гишүүн бухимдаж байсан. Тэгвэл О.Эрдэнэсолонгыг гэр бүлийнхнийх нь хүсэлтээр батлан даалтанд гаргасан байна. Тодруулбал, өнгөрсөн даваа гарагт эхнэрээ биеийн байдал муу байгаа хэмээн гадуур байцаахыг мөрдөн байцаах газраас Ё.Отгонбаяр гишүүн хүссэн. Улмаар мөрдөн байцаах газраас хүсэлтийг хүлээн авч прокурорт мэдүүлсэн билээ. Тэгвэл өчигдөр ийн О.Эрдэнэсолонгыг батлан даалтад гаргажээ.

  УМБГ-аас Ё.Отгонбаярыг авлига авахаар сүрдүүлсэн гэх хэргийг шалгаж байх үед эхнэрийнх нь “Зоос”, “Голомт”, “Худалдаа хөгжлийн банк”, Улаанбаатар хотын банк гэсэн дөрвөн банк дахь дансаар их хэмжээний мөнгөн гүйлгээ хийсэн нь илэрсэн юм.  О.Эрдэнэсолонго 2009-2013 оны хооронд нийт 323 сая ам.доллар, 13.9 тэрбум төгрөг байршуулсан болох нь илэрсэн байдаг. Тиймээс цагдаагийнхан 452 тэрбум гаруй төгрөгтэй тэнцэх хэмжээний ам.доллар дансаар нь дамжсан, төгрөгөөр 13.9 тэрбум төгрөг байршуулсан гэж цагдаагийн байгууллага мэдэгдээд байна.