Сэлэнгэ аймгийн Цагдаагийн газрын Эрүүгийн тасгийн дарга, цагдаагийн хошууч П.Өлзийсайханыг бусдад авлига өгч албан тушаал дэвшсэн, бусдыг айлгаж, дарамтлан хахууль авдаг байсан гэх хэрэгт сэжигтнээр татан шалгаж эхлээд байгаа. Түүнийг өнгөрсөн тавдугаар сарын 21-нд Улсын мөрдөн байцаах газрын Мөрдөн шалгах хэлтсээс баривчлан, Цагдан хорих 461 дүгээр ангид саатуулсан бөгөөд цагдан хорих хугацаа энэ сарын 6-нд дуусах байсан ч дахин шалгах шаардлагатай гэж үзсэн тул хорих хугацааг сунгаад байгаа талаар эх сурвалж мэдээллээ. 

Түүний ар гэрийнхэн нь түүнийг хорьсон нь хэлмэгдүүлэлт хэмээн үзэж сэтгүүлчдэд хүртэл хандаад байсан билээ.  Тэд "долоон жилийн өмнө маргалдсан хүнийг хүчээр өргөдөл бичүүлж. Улмаар Өлзийсайхныг хорьлоо. Өөрөөр хэлбэл түүнийг хилс хэргээр шоронд суулгаж байна" гэж байсан юм.