Cүүлийн үед авлигалын томоохон хэргүүд шил шилээ даран илэрч ихээхэн дуулиан дэгдээж байгаа. Зарим нэгний тооцоолж байгаагаар бол авлигалын улмаас төрөөс алдагдсан мөнгөний хэмжээ 60 орчим тэрбум төгрөгт хүрсэн гэгддэг.  Энэ мөнгөөр 40 сургууль, 12 сургууль, 8 эмнэлэг барьж болно гэсэн судалгаа ч гарсан. Тэгвэл одоо илрээд байгаа мөнгөний дэргэд жинхэнэ дуулиан болж мэдэх нэгэн асуудал зарлагдах өдрөө хүлээж байгаа гэж эх сурвалж мэдээллээ. Гэхдээ сонгуулийн дараа. 

    Энэ бол уулын баяжуулах Эрдэнэт үйлдвэрийг дагасан шахааны бизнесийн зах зух юм. Бас Монгол-Оросын хамтарсан энэ үйлдвэрийн нэрээр нэгэн хувийн аж ахуйн нэгж их хэмжээний мөнгө зээлж аваад түүнийгээ төлж чадахаа байчихсан асуудал гэнэ. Хувийн компани яахаараа хоёр улсын үйлдвэрийн нэрээр зээл авчихав гэдэг нэгэн сонирхолтой асуудал гарч ирнэ. Үүнийг салбарын сайд хүртэл толгой даагаад хийж чадахгүй том асуудал гэж яригдаж байна. Эх сурвалжийн мэдээлж байгаагаар бол Эрдэнэт үйлдвэр нэгэн хувийн аж ахуйн нэгжид баталгаа гаргаж өгчээ. П.Жасрайн Засгийн газар Б.Жаргалсайханы “Буян” компанийн өмнөөс Марубенид баталгаа гаргаж өгсөн шиг юм болж. Нөгөө хувийн компани нь асар их хэмжээний зээлээ график хугацаагаараа төлж чадахаа байж. Тэгэхээр зээлийг баталгаа гаргаж өгсөн Эрдэнэт үйлдвэр төлөх үүрэгтэй аж. Эрдэнэт төлнө гэдэг бол улс төлнө гэсэн үг. Улс төлнө гэдэг бол ард түмний татварын мөнгөөр л хувийн компанийн өрийг дарна гэсэн үг.

    Мөнгөн дүнг нь сонсох юм бол овоо олон хүний тархинд цус харваж магадгүй гэнэ. Учир нь захын агентлагийн хурган даргын нууц амрагийн данснаас тэрбум төгрөг гарч ирээд байхад Монгол Улсыг 20 гаруй жил тэжээж байгаа супер үйлдвэрээс супер л юм гарч ирэх нь тодорхой. Зун, намрын супер ярианы сэдэв ингээд удахгүй дэлгэгдэх нь гарцаагүй боллоо. 

    Уг асуудлыг шалгалтын хэсэг нарийвчлан судлаад бараг тогтоосон сураг байна. Удахгүй олон нийтэд дэлгэж ард түмний амыг ангайлгах бололтой. Гэхдээ улсын ганц том үйлдвэрийн нэрээр баталгаа гаргуулж чадсан хувийн  компанийн нэр маш нууц байна. Бас хэн баталгаа гаргуулсан бэ, хэдэн онд, мөнгөний дүн, зээлийнхээ хүүг өнөөг хүртэл төлж байсан уу гэх мэт олон түмний хамгийн түрүүнд сонирхох ёстой асуудал одоогоор маш бүрхэг байна. Эрх мэдэлтнүүд энэ асуудлын талаар мэдээлэл өгөхгүй байна. Учир нь хэргийг эцсийн байдлаар мухарлаагүй аж. Гэхдээ л ийм үйл явдал болоод өнгөрснийг эрх мэдэлтнүүд бараг бүгд мэдэжээ. Хэрэв холбогдох ажлын хэсэг шалгалтын дүнгээ танилцуулсаны дараа уг асуудлыг хуулийн байгууллагад шилжүүлэх аж.

    Тэгэхээр хуулийн байгууллага нэгэн том хэргийн араас орох нь гарцаагүй болов. Ийм том хэргүүд нэг бол шоу болоод найран дундаа өнгөрдөг. Эсвэл ихээхэн олон нөлөө бүхий хүмүүсийг хөлдөө чирснээр дуусдаг түүхтэй. Ингээд олон түмэн энэ зун, намар ярих юмтай, сонирхох маргах шинэ сэдэвтэй болох нь.