ОХУ-аас Монгол Улсад суугаа Онц бөгөөд Бүрэн эрхт элчин сайд В.В.Самойленко Монгол Улсын Ерөнхийлөгчийн Тамгын газрын дарга П.Цагаанд хандаж уучлалт гуйсан албан бичиг илгээлээ.

   Албан бичигт “Монгол Улсын ТВ-9 телевиз Монгол Улсын Ерөнхийлөгчийн сонгуулийн ажиглагчаар ажилласан ОХУ-ын Сонгуулийн төв хорооны дарга В.Е.Чуровын хэлсэн үгийг зургадугаар сарын 26-ны өдөр хийсэн сурвалжлагаараа монгол хэлээр орчуулан хүргэхдээ алдаа гаргаж В.Е.Чуровын хэлээгүй үгийг хэлсэн мэтээр дамжуулжээ.  

Манай тал шуурхай арга хэмжээ авсны үр дүнд зургадугаар сарын 26-ны оройн нэвтрүүлгээрээ ТВ-9 телевиз залруулга хийсэн болно. Танд В.Е.Чуровын орос хэл дээр хийсэн тайлбар, ТВ-9 телевизийн дамжуулсан мэдээг хүргэж байна” гэжээ.
 
ОХУ-ын Сонгуулийн төв хорооны дарга В.Е.Чуровын хэлсэн үгийн албан ёсны эх дээр “ОХУ-ын Сонгуулийн төв хорооны ажиглагчдын хувьд Монгол Улсад сонгуулийн цахим систем хэрэглэж байгаа нь маш сонирхолтой байлаа. Энэ систем нь гадаадын нэг нэртэй фирмийн бүтээгдэхүүн юм.
 
Ийм системийг Филиппинд ашиглаж сонгууль явуулж байсныг бид ажиглаж байсан. Уг сисмемийг Монголд хэрхэн ашиглаж байгааг бид харьцуулж харж байна. ОХУ-ын сонгуульд ашигладаг системээс юугаараа өөр юм гэдгийг бас харьцуулж үзэж байна. ОХУ-д ашигладаг цахим системийг Орост дотооддоо үйлдвэрлсэн байдаг. Орос, Монголд ашиглаж байгаа системүүдийн үйлдлийн зарчим ижил боловч ялгаатай талууд байна. Монголд ашиглаж байгаа системийн үзүүлэлт нь хэсгийн хороо тус бүрт санал өгч байгаа сонгогчдыг эрэгтэй, эмэгтэй, насны ангиллаар нь бүлэглэн харуулдгаараа сонирхолтой, шинэлэг юм. Үүнийг бусад газруудад ч хэрэглүүштэй зүйл юм” гэжээ.
 
Харин ТВ-9 телевизээр үүнийг дамжуулахдаа “Дэлхий дээр хамгийн муу сонгууль явуулдаг газар бол АНУ. Би дэлхийн олон оронд очиж сонгуулийн үйл явцыг ажиглаж байсан. Монголд явуулж буй сонгууль нь АНУ-ынхтай төстэй харагдлаа. Гэхдээ Монголын сонгуулийн зохион байгуулалт, иргэдийн бүртгэлийг сайн хийсэн байдал нь тун сайн юм. Мөн хэн саналаа өгсөн бүртгэлийг сайн хийж эрэгтэй, эмэгтэй, насны ангиллаар нь дүн мэдээ гаргаж байгаа нь сайшаалтай хэрэг юм” хэмээн орчуулжээ.
 
Ийнхүү ТВ-9 телевиз орчуулгын алдаа хийсэн учир ОХУ-аас Монгол Улсад суугаа Онц бөгөөд Бүрэн эрхт элчин сайд В.В.Самойленко ийнхүү уучлалт гуйсан албан бичиг ирүүлээд байна.