Байцаагч бүсгүйчүүдийн хэрэг олны анхаарлын төвд байсаар байгаа энэ үед Д.Батболд гэгч хоёр бүсгүйг ийм байдалд хүргэсэн залуугийн талаарх мэдээллүүд бага багаар дэлгэгдэж эхэлж байна. Түүнийг  хоёр бүсгүйд хоёуланд нь нэлээдгүй үнэтэй “Волксваген Таурег” маркийн автомашин бэлэглэж байсан бэл бэнчинтэй нэгэн.  Мөн өмнө нь татварын байцаагчаар ажиллаж байгаа удалгүй Эрдэс баялаг, эрчим хүчний яам байхад Хуулийн хэлтсийн даргаар ажиллах болсон. Улмаар Эрдэс баялаг, эрчим хүчний яам салахад Уул уурхайн яаманд үлдэж Төрийн захиргааны удирдлагын газарт ахлах мэргэжилтэн хийж байсан. Харин өдгөө тушаал дэвшиж Уул уурхайн яамны Төрийн захиргааны удирдлагын газрын даргын албан тушаалыг хашдаг гэх мэт мэдээллүүд олны чихэнд хүрсэн. Тэгвэл  Д.Батболд нь Ашигт малтмалын газрын даргаар ажиллаж байгаад албан тушаалаа урвуулан ашигласан хэргээр шүүхээс 3.6 жилийн ял сонсоод буй Д.Батхуягийн төрсөн дүү хэмээн албаны бус эх сурвалж хэллээ.