НИТХ-ын дарга асан Т.Билэгтийг Н.Энхбаярын хууль бус хувьчлалын хэрэгтэй холбоотойгоор шалгах шаардлага гарсан. Гэвч түүнийг гадны аль нэг оронд орогнож, байцаалт өгөхөөс зугтсан гэх үндэслэлээр Интерполоор эрэн сурвалжилж байсан юм. Тэгвэл тэрээр өнгөрсөн баасан гарагийн шөнө Монголдоо ирсэн бөгөөд бямба гарагийг өглөө гэрээс нь баривчилжээ. Өдгөө Хорих 461 дүгээр ангид саатуулагдсан аж.  Прокурорын шийдвэрээр түүнийг эхний удаад 14 хоногоор баривчлан саатуулаад байгаа бөгөөд баривчлах хугацааг сунгах эсэх нь түүний биеийн байдлаас шалтгаалах бололтой. Учир нь түүний АНУ руу явах болсон шалтгаан нь хэргийн мөрдөлтөөс оргон зайлсан хэрэг гэж хуулийнхан үзэж байгаа ч өмгөөлөгч нь зүрхний хагалгаа хийлгэх зорилгоор явсан гэж мэдүүлсэн билээ. Ямартаа ч Т.Билэгтийг баривчлах үеэр түүнд үзлэг хийхэд биед нь хагалгаа хийлгэсэн шарх сорви, ямар нэг ул мөр байгаагүй хэмээн эх сурвалж мэдээллээ.