Аймаг, нийслэлийн Мэргэжлийн хяналтын газар энэ оны хоёрдугаар сарын 20-ноос зургаадугаар сарын 20-ны өдрүүдэд бүх шатлалын эрсдэлтэй үнэлэгдсэн 193 эмнэлэгт хяналт шалгалт хийжээ. Шалгалтанд хамрагдсан эрсдэлтэй 193 эмнэлгийн эрсдлийг хяналтын хуудсаар үнэлэхэд, 12 буюу 6.2 хувь нь их эрсдэлтэй, 95 буюу 49.2 хувь дунд эрсдэлтэй, 79 буюу 40.9 хувь нь бага эрсдэлтэй үнэлэгдсэн байна.

-Мэргэжилтнүүд төв, болон тусгай мэргэжлийн  төвүүдийн дарга нарын сонгон шалгаруулалт удааширч томилогдоогүй, эмнэлгийн мэргэжилтний үүргийн биелэлт хангалтгүй, эмч, мэргэжилтнүүдийн ажлын хариуцлага, өвчтөнд хандах хандлага сул, ёс зүй, зан харьцааны соёл, эмчилгээ оношилгооны чанар, эм зүй, халдвар хамгааллын дэглэмтэй холбоотой зөрчил дутагдал буурахгүй байгааг онцолжээ.

-Мөн эмчийн хариуцлага, мэргэжлийн мэдлэг, ур чадвар,  эмчилгээ, оношилгооны технологи, үр дүнгийн түвшин, өвчний эхлэл, явц, төгсгөлийн үе шат, эмчилгээний үр дүнг илтгэн харуулах “Өвчний түүх”-ийн хөтлөлт, бичилт шаардлага хангахгүй байгаа дутагдал оршсоор байгаа нь эмнэлгийн мэргэжилтний санаачилга дутаж,  үүргээ хангалтгүй биелүүлж  байгаатай холбоотой гэнэ.


-Яаралтай амь тэнссэн үед авах арга хэмжээний ур чадварыг эмч мэргэжилтнүүдийн тодорхой хувь нь эзэмшиж мэргэшээгүй байгаа нь цаг алдалгүй чанартай  тусламж үзүүлэх боломж бүрдүүлж чадахгүй байгаа аж.

-Хүүхдийн эмчийн чиглэлээр бэлтгэгдсэн боловсон хүчний хүрэлцээ хангамж дутагдалтайгаас  хүүхдэд зонхилон тохиолдож буй өвчин эмгэгийг  оношилж эмчлэх тусламж үйлчилгээнй чанар, хүртээмжинд сөргөөр нөлөөлж байна гэв.