Сангийн дэд сайд асан Ч.Ганхуяг болон эмч Б.Болдсайхан нар Засгийн газрын ордон руу салаавч гаргаж, эсэргүүцлээ илэрхийлсэн. Б.Болдсайхан эмчийг цагдаагийн газраас дуудаж байцаалт авсан, эрүүгийн хэрэг үүсгэж магадгүй гэх мэдээлэл хэвлэлээр цацагдаад байсан. Энэ талаар ЦЕГ-ын хэвлэл мэдээллийн ажилтан Я.Лхагвасүрэнгээс тодруулахад Б.Болдсайхан нарыг салаавч гаргаж, танхайрсан гэдгээр биш зөвшөөрөлгүй жагсаал зохион байгуулсан хэмээн цагдаагийн газраас дуудсан гэсэн тайлбар өглөө. Мөн тэднийг байцаагаагүй бөгөөд дараагийн удаа жагсаал хийхдээ зохих байгууллагаас зөвшөөрөл авах, дахин тийм үйлдэл гаргахгүй байхыг сануулаад явуулсан гэв. Хуулиар бол 10-аас дээш хүн цугларвал жагсаал, цуглаан гэж үздэг аж. Тухайн өдөр Ч.Ганхуяг, Б.Болдсайхан нартай хамт 10 гаруй хүн Чингисийн талбай дээр цугларсан байжээ. Тиймээс тэднийг зөвшөөрөлгүй жагсаал хийсэн гэж үзсэн нь энэ аж. Түүнээс биш танхайрсан гэж эрүүгийн хэрэг үүсгэх асуудал огт яригдаагүй юм байна.