Албан тушаалаа ашиглан улсаас их хэмжээний мөнгө “идсэн” хэргээр саатуулагдаж байсан Эрүүл мэндийн яамны Төрийн нарийн бичгийн дарга асан Н.Түмэндэмбэрэлийг өнгөрсөн баасан гаригт сулласан байна. Түүний өмгөөлөгч, ар гэрийнхнийх нь хүсэлтээр эрүүл мэндийн байдлыг нь харгалзан ийнхүү батлан даалтад гаргажээ. Хэргийн явцын талаар АТГ-ын мөрдөн байцаах хэлтсийн дарга Э.Амарбатаас тодруулахад "Улсын мөрдөн байцаах газраас манайд харьяаллын дагуу шилжиж ирсэн хэрэг байгаа. Улсын клиникийн зарим эмнэлгүүдэд шаардлагатай техник, тоног төхөөрөмжийг худалдаж авахдаа мөн худалдан авах худалдааны тухай хуулийг зөрчиж авсан гэх асуудлаар эрүүгийн хэрэг үүсгэж шалгаж байгаа. Н.Түмэндэмбэрэл цагдан хориотой байсан ч цаашид цагдан хорихгүйгээр мөрдөн байцаалтыг үргэлжлүүлж явуулах боломжтой байна гэж үзэж цагдан хорих таслан сэргийлэх ажиллагааг өөрчилсөн байгаа. Одоо гадуур шалгагдаж байна. Хэрэг эцэслээд яаж шийдэгдэх нь хэрэгт цугласан нотлох баримтын хүрээнд шийдэх учраас урьдчилжх хэлэх боломжгүй байна" гэв.