Увс аймгийн засаг дарга асан Э.Цасчихэрт холбогдох Төрийн албан хаагчдын 3-р ээлжийн 16 айлын орон сууцыг нэр бүхий 16 хүнд хувиарласан тухай давж заалдах шатны шүүх хурал нийслэлийн захиргааны хэргийн шүүхэд боллоо.Төрийн албан хаагчдын 3-р ээлжийн 16 айлын орон сууцыг нэр бүхий 16 хүнд хувиарласантай холбоотой давж заалдах шатны шүүх хурал 9-р сарын 04-нд нийслэлийн захиргааны хэргийн шүүхэд боллоо. Уг хурлаар Увс аймгийн 11 иргэний нэхэмжлэлтэй Засаг даргад холбогдох хэргийн анхан шатны шүүхийн шийдвэрийг хэвээр нь үлдээх шийдвэр гаргажээ. Өөрөөр хэлбэл төрийн албан хаагчдын 3-р ээлжийн 16 айлын орон сууцны өмнөх хувиарлалт буюу дарга нар авсан байсныг хүчингүй болгосон аймгийн Засаг даргын захирамжийг хүчинтэй хэвээр үлдээсэн байна.
Уг орон сууцыг 2012 оны 12-р сарын 3-нд аймгийн Засаг дарга асан Э.Цасчихэр ажлаа өгөхөөсөө өмнө нэр бүхий 16 хүнд хувиарласан. Уг шийдвэр нь эрх зүйн үндэслэлгүй, аймгийн Засаг даргын эрх хэмжээнд үл хамаарах асуудал гэж үзэж одоогийн аймгийн Засаг дарга Д.Цэндсүрэн 2013 оны нэгдүгээр сарын 14-нд өмнөх захирамжийг хүчингүй болгосон. Учир нь төрийн албан хаагчдын орон сууцыг аймгийн Засаг дарга биш, ИТХ-ын тэргүүлэгчдээр шийдвэрлэх нь зүйтэй гэж үзсэн. Харин үүнийг эсэргүүцсэн тухайн үед байрны квотод багтсан нэр бүхий 11 иргэн Захиргааны хэргийн шүүхэд хандаж нэхэмжлэл гаргасан байна.
Анхан шатны шүүх хурал Баян-Өлгий аймгийн Захиргааны хэргийн шүүхэд 2013 оны 07 дугаар сарын 01-нд болж, шүүхийн 37-р тогтоол гарсан. Тус шүүхийн шийдвэрээр “Төрийн албан хаагчийн орон сууцыг хэн авахыг хувиарлах нь аймгийн Засаг даргад хууль тогтоомжоор олгогдсон эрх хэмжээнд үл хамаарах бөгөөд тэгш эрхийн болон шударга ёсны зарчмыг алдагдуулсан” хэмээн дүгнэсэн байна. Ингэснээр аймгийн Засаг дарга Д.Цэндсүрэнгийн захирамж хууль зүйн үндэслэлтэй гэж үзэн, нэхэмжлэгчдээс гаргасан гомдлыг хэрэгсэхгүй болгожээ.
Шүүхийн шийдвэрийг эсэргүүцсэн нэхэмжлэгчдийн өмгөөлөгч болон төлөөлөгчдийн зүгээс Захиргааны хэргийн Давж заалдах шатны шүүхэд дахин гомдол гаргасан байна. Давж заалдах шатны шүүхээс тэгш эрх, ил тод байдал, шударга ёсыг эрхэмлэсэн Д.Цэндсүрэн даргын захирамжийг үндэслэлтэй хэмээн үзэж анхан шатны шүүхийн шийдвэрийг ийнхүү хэвээр баталлаа.
Цаашид эрх тэгш байдал, шударга ёсыг хангахын тулд төрийн албан хаагчийн хөнгөлөлттэй байр хэрхэн хувиарлах тухай журам боловсруулан мөрдөж эхлээд байна. Уг журманд заасанчлан “Квотын дагуу хуваариласан орон сууцыг тухайн байгууллага хамт олны хурлаар хэлэлцүүлж хэнд өгөхөө шийдэж, аймгийн Засаг даргад уламжилна. Аймгийн Засаг дарга хамт олны шийдвэрийг хүндэтгэн үзэх үүрэг хүлээнэ” гэж заасан байна.
Тэгэхээр тухайн байгууллага, хамт олны дундаас хэн нь хөнгөлөлттэй үнээр байр, орон сууц авах вэ? гэдгийг аймгийн Засаг дарга биш хамт олон нь шийддэг боллоо. Ингэснээр хүүхдийн өмнө насаараа зогссон багш нар, иргэдийн эрүүл мэндийн төлөө зүтгэж яваа эмч, сувилагч, асрагч нар, иргэдийн эрх чөлөө, аюулгүй байдлын төлөө цаг наргүй зүтгэж яваа цагдаа гээд эгэл жирийн төрийн албан хаагч нар 40% -ийн хөнгөлөлтэй нөхцлөөр орон сууцтай болох боломж бүрдээд байгаа нь энэ.
Дарга нар үгсэн хуйвалдаж өөрсийн гэр бүл, хамаатан саданд хөнгөлөлттэй үнээр орон сууц өгч, авдаг явдлыг таслан зогсоосныг шүүхийн шийдвэр баталгуужуулж байна.
