--- Дэлхийн эдийн засгийн чуулга уулзалт,  Монгол Улсын Засгийн газар хамтран Монгол Улсын хөгжлийн ирээдүйн асуудлаар "Дэлхийн эдийн засгийн чуулга уулзалтын стратегийн яриа хэлэлцээ"-г Улаанбаатар хотноо өнөөдөр, маргааш хоёр өдөр анх удаа зохион байгуулах гэж байна.  Өнөөдөр Дэлхийн эдийн засгийн чуулга уулзалтын дугуй ширээний уулзалт болно. Дугуй ширээний энэ ярилцлагад Монгол Улсын Ерөнхийлөгч, УИХ-ын дарга, Ерөнхий сайд болон УИХ, Засгийн газрын гишүүн, гадаад улс орнуудын шийдвэр гаргах түвшний хүмүүс, бизнесийн салбарын манлайлагчид гээд 170 гаруй төлөөлөгч оролцоно. Гадаадаас 30 гаруй орон, олон улсын байгууллагын 90 гаруй төлөөлөгч ирэх гэж байна.

---Өнөөдөр 12 цагт "Blue moon" арт галерейн үзэсгэлэнгийн танхимд "Аялагч зураачдын клуб"-ээс "Mиний нутаг" уран бүтээлийн үзэсгэлэн болно. "Blue moon" art gallery-н дэргэдэх "Аялагч зураачдын клуб"-ээс "Mиний нутаг" сэдвээр байгалийн судалбар хийх зуны аяллыг 2013.07.20-08.06-ны хооронд зохион явуулж, эх орныхоо үзэсгэлэнт байгаль болох Алтайн өвөр говиор аялан уран бүтээлийн арвин их олзтойгоор ийнхүү үзэсгэлэнгээ дэлгэн үзүүлж байгаа юм байна.

----Өнөөдөр МУБИС-ийн санаачилгаар Тусгаар Тогтнолын ордны урд талбайд 600 оюутантай өглөөний дасгал болно.

---- Өнөөдөр "Уурхайн хаалт ба байгаль орчны хамгаалал" ээлжит хурал болно
МХЕГ, ХБНГУ-ын BGR төсөл хамтран зохион байгуулдаг "Уурхайн хаалт ба байгаль орчны хамгаалал" найм дахь энэ удаагийн хурал "Уурхайн хаалт, байгаль орчны хамгааллын асуудлаархи төрийн бодлого, хамтын ажиллагаа", "Уурхайн хаалт, нөхөн сэргээлтийн ажлын өнөөгийн түвшин" гэсэн сэдвийн хүрээнд зохиогдож байгаа бөгөөд Уул уурхайн сайд Д.Ганхуяг, БОНХ-ийн сайд С.Оюун нар оролцож, салбарын эрхзүйн шинэчлэл, баримтлах бодлогын талаар илтгэл тавих юм.

---Монголын сонирхогчдын хөлбөмбөгийн "Ирээдүй Лиг-2013" гурав дахь жилдээ өнөөдөр зохион байгуулагдах гэж байна. "Монгол Даатгал" болон "МЭЗХЗХ" ТББ-аас хамтран зохион байгуулдаг хамгийн олон оролцогчтой "Ирээдүй Лиг" энэ жилээс эхлэн дүрэмдээ өөрчлөлт оруулж шинэ шатанд орж дээд лигээ байгуулжээ.

----"Монгол ралли" уралдаан өнөөдөр хоёр дахь өдрөө үргэлжилнэ. Тамирчид Улаанбаатар - Дундговь - Дорноговь - Хэнтий - Улаанбаатар гэсэн чиглэлээр 1500 км замыг гурван өдөрт туулах юм.