Бямбаа, Батаа хоёр 2005 онд гэр бүл болж, 2006 онд охин Мишээл нь төржээ. Тэд гурван жил хамт амьдарсны эцэст удалгүй таарч тохирохгүй, сэтгэл нийлэхгүй болсон тул тусдаа байх болсон байна.

Тэд тусдаа амьдраад дөрвөн жил өнгөрсний дараа Бямбаа “Нөхөр маань муухай ааштай, хартай учир ажил төрөл хийлгэдэггүй, бас гар хүрч байсан ч удаатай. Иймд бидний гэрлэлтийн баталгааг хүчингүй болгож, охины маань ургийн овог болон эцгийн нэрийг сольж, эхээр нь овоглуулан хүүхдийн тэтгэлэг гаргуулж өгнө үү” гэж шүүхэд ханджээ.

Харин нөхөр нь “Эхнэрийн эцэг эх, ах дүү нарын дарамтаас болж бид салсан. Хэдийгээр гэрлэлтээ цуцлуулахыг зөвшөөрч байгаа ч охиноо өөр дээрээ авмаар байна. Овог солиулахыг зөвшөөрөхгүй” гэжээ.

Анхан шатны  шүүхээр тэдний гэрлэлтийг цуцалж, охиныг ээжийнх нь асрамжид үлдээн 18 нас хүртэл эцгээр нь тэтгэлэг төлүүлэхээр шийдвэрлэсэн байна.

Гэтэл Батаа өмгөөлөгчөөрөө дамжуулан Дээд шүүхэд гомдол гаргажээ. Үүндээ “Охиныг маань төрөх эмнэлгээс гарахад хадмууд надад ч харуулалгүйгээр гэр рүүгээ авч явсан. Бидний амьдарсан хугацаа бага. Бямбаа хүүхдийн овгийг солиулахыг шүүхээс шаардаж, ямар шалтгаанаар  овгийг солиулах гэж байгааг шүүгч асуухад “би хүнтэй суух гэж байгаа, эцгээр нь овоглох гэсэн юм” гэж хариулж байсан. Эдгээр байдал нь эргэлзээ төрүүлж байгаа тул шинжилгээ хийлгүүлэх боломжийг олгож өгөхийг хүсье” гэжээ.

Дээд шүүх тэдний гэрлэлтийг цуцалж, охиныг ээжид нь үлдээн, тэтгэлэг гаргасан өмнөх шатны шүүхийн шийдвэрийг хэвээр үлдээсэн байна.

Харин маргагчид хамтран амьдрах хугацаанд охин Мишээл төрсөн, охиныг эцэг Батаагаар нь овоглон өсгөн хүмүүжүүлж байгаа, хэрэг хянан шийдвэрлэх ажиллагааны явцад аав нь охины эцэг мөн эсэх талаар маргаагүй атлаа Бямбаагийн биеэ авч яваа зарим байдал нь охины эцэг мөн эсэхэд эргэлзэх байдлыг төрүүлэх боллоо гэж тайлбарлан “шинжилгээ хийлгүүлээд үзье гэсэн санаагаар гомдол гаргасан” гэх хариуцагч Батаагийн гомдлыг хангах хуулийн үндэслэл тогтоогдохгүй байна гэж үзжээ.

Энэ бол шүүхээр шийдвэрлэсэн гэр бүлийн маргааны энгийн л хоёр жишээ.  Үүний адил гэр бүл цуцлалтын золиос хүүхэд болж үлддэг нь харамсалтай.