Дэлхийн уул уурхайн томоохон компаниудын нэг, “Оюутолгой” төслийн хөрөнгө оруулагч “Рио Тинто” компани Австрали дахь нүүрсний уурхайн хувь эзэмшлээ нэг тэрбум ам.доллараар худалдах болсоноо мэдэгдсэн. Тодруулбал,  тус компани Австрали дахь чулуун нүүрсний уурхайг 50.1 хувиа Швейцарь, Японы томоохон нэгдэлд худалдахаар болж байгаа юм.

  Харин тэдний энэ үйлдлийг "Оюутолгой”-той холбон тайлбарлах хүмүүс цөөнгүй байна. Учир нь “Оюутолгой”-д ихээхэн хэмжээний санхүүжилт  шаардлагатай болсон. Үүнийгээ ч илэрхийлж төслийг удирдаж буй “Рио Тинто” засгийн газартэй хэлэлцээр хийхийг хүссэн.  Тиймээс Монголын засгийн газар болон “Рио Тинто” компанийн хоорондох хэлэлцээр үргэлжилж байгаа.  Одоогоор талууд харилцан шийдэлд хараахан хүрээгүй байгааг ч “Оюутолгой” компанийн захирал Да.Ганболд дуулгасан юм.

    Түүнчлэн “Рио Тинто” компани 4.9 тэрбум фунт стерлинг буюу найман тэрбум ам.долларын зээл авах хүсэлтийг олон улсын байгууллагуудад гаргасан байна. Тус компанийн ийнхүү зээл хүсэх болсон шалтгаан нь өмнөх зээлээ дахин санхүүжүүлэхийн тулд гэнэ. Тодруулбал, тус компани 2010 оны арваннэгдүгээр сард авсан зургаан тэрбум ам.долларын зээлээ ирэх 2015 онд эргэн төлөх ёстой болоод байгаа. Тиймээс зээл авч зогсонги байдалд ороод буй төсөл хөтөлбөрүүдээ урагш ахиулах гэж байгаа бололтой гэж зарим эх сурвалжууд өгүүлж байна.

   Мөн “Рио Тинто” компани уг мөнгөөр "Оюутолгой" төсөлд хөрөнгө оруулбал Монголын талд маш хохиролтой гэдгийг ч олон хүн хэлж байгаа юм. Өөрөөр хэлбэл, ингэснээр Монгол Улс ямар нэгэн хэлбэрээр ирээдүйд ихээхэн хэмжээний өртэй үлдэнэ гэж таамаглаж байгаа бололтой.

   Ямартаа ч одоо болтол тус компанийн зээлэх гэж буй найман тэрбум ам.долларыг чухам юунд зарцуулах нь тодорхойгүй байна.